ગુજરાતના કૃષ્ણ મંદિરોમાં ભક્તોનું ઘોડાપૂર..

સમગ્ર દેશમાં આજે ભગવાન શ્રીકૃષ્ણના જન્મોત્સવ, જન્માષ્ટમી પર્વની ધામધૂમપૂર્વક ઉજવણી થઈ રહી છે. આ પવિત્ર અવસરે ગુજરાતના સુપ્રસિદ્ધ કૃષ્ણ મંદિરોમાં શ્રદ્ધાળુઓનું ઘોડાપૂર ઉમટી પડ્યું છે. દ્વારકા, ડાકોર અને શામળાજી જેવા મંદિરોમાં વહેલી સવારથી જ મંગળા આરતી અને દર્શન માટે લાંબી કતારો જોવા મળી રહી છે.

જન્માષ્ટમીના પાવન પર્વે દ્વારકાધીશના દર્શન કરવા માટે ભક્તોનો અવિરત પ્રવાહ વહેલી સવારથી જ શરૂ થઈ ગયો છે. 'જય દ્વારકાધીશ'ના જયઘોષ સાથે ભક્તોએ ભગવાનના દર્શનનો લ્હાવો લીધો હતો. આ વર્ષે સાતમના દિવસે જ 1.69 લાખથી વધુ શ્રદ્ધાળુઓએ દર્શન કર્યા હતા, જે દર્શાવે છે કે આસ્થા કેટલી ઊંચી છે. સમગ્ર દ્વારકા નગરીને રોશની અને ધ્વજાઓથી સજાવવામાં આવી છે, અને મંદિરમાં વિશેષ આરતી અને ભજન-કિર્તનના કાર્યક્રમોનું આયોજન કરવામાં આવ્યું છે.

દ્વારકામાં જય દ્વારકાધીશના નાદથી ગુંજ્યું વાતાવરણ

સુપ્રસિદ્ધ યાત્રાધામ ડાકોરમાં પણ જન્માષ્ટમીની ઉજવણી ભારે ઉત્સાહ સાથે થઈ રહી છે. મંદિરને જન્માષ્ટમી પૂર્વે જ ભવ્ય રીતે શણગારવામાં આવ્યું હતું. આજે સવારે 6:45 કલાકે મંગળા આરતી કરવામાં આવી, ત્યારબાદ દર્શન માટે ભક્તોનો અવિરત પ્રવાહ શરૂ થયો છે. 'જય રણછોડ માખણ ચોર'ના નાદથી ડાકોરનું વાતાવરણ ગુંજી ઉઠ્યું છે. ભક્તોની ભારે ભીડને ધ્યાનમાં રાખીને સુરક્ષા માટે કડક પોલીસ બંદોબસ્ત ગોઠવવામાં આવ્યો છે.

શામળાજી મંદિરમાં ભવ્ય સજાવટ અને મટકી ફોડ ઉત્સવ

રાજ્યના અન્ય એક મુખ્ય કૃષ્ણ મંદિર, શામળાજીમાં પણ જન્માષ્ટમી પર્વની ધામધૂમપૂર્વક ઉજવણી થઈ રહી છે. વહેલી સવારથી જ ભગવાન શામળિયાના દર્શન માટે ભક્તોની ભીડ ઉમટી પડી છે. ભગવાનને આકર્ષક સુવર્ણ અલંકારો અને ભવ્ય વાઘાથી શણગારવામાં આવ્યા છે. દિવસ દરમિયાન વિવિધ કાર્યક્રમોનું આયોજન કરવામાં આવ્યું છે, જેમાં ખાસ કરીને 108 મટકી ફોડનો ઉત્સવ ભક્તો માટે આકર્ષણનું કેન્દ્ર બન્યો છે. આ મંદિરોમાં આસ્થાનો અનોખો સંગમ જોવા મળી રહ્યો છે, જ્યાં ભક્તો ભગવાનની ભક્તિમાં લીન બની ગયા છે.