રાજકોટની ગૌશાળામાં કરુણ ઘટના: 20 ગાયોના શંકાસ્પદ મોત
રાજકોટ જિલ્લાના કોટડાસાંગાણી તાલુકાના સાંઢવાયા ગામે આવેલી રામગર બાપ ટ્રસ્ટ સંચાલિત ગૌશાળામાં શુક્રવારે સવારે એક અત્યંત કરુણ ઘટના સામે આવી છે. ગાયોને ઘાસચારો અને મગફળીનો ખોળ ખવડાવ્યા બાદ એક પછી એક ગાયો તરફડીને મૃત્યુ પામતાં સાંજ સુધીમાં મૃત્યુઆંક 20 પર પહોંચી ગયો હતો. આ ઘટનાથી સમગ્ર પંથકમાં શોક અને અરેરાટી ફેલાઈ ગઈ છે.
નિત્યક્રમ બાદ અચાનક મોતનો સિલસિલો :&nbsp;
પ્રાપ્ત માહિતી મુજબ, સાંઢવાયા ગામની આ ગૌશાળા છેલ્લા 27 વર્ષથી કાર્યરત છે અને હાલમાં તેમાં આશરે 350 જેટલી ગાયોનો નિભાવ થાય છે. શુક્રવારે સવારે ગાયોને નિયમિતપણે ચારો આપવામાં આવ્યો હતો. જોકે, ચારો ખાધા પછી ગાયો અચાનક તરફડીયા મારવા લાગી અને તેમના મૃત્યુ થવા લાગ્યા. સાંજ સુધીમાં 20 જેટલી ગાયોએ જીવ ગુમાવ્યો હતો.
પશુપાલન વિભાગની ટીમ ઘટનાસ્થળે, સારવાર શરૂ :&nbsp;
ઘટનાની ગંભીરતાને ધ્યાનમાં રાખીને પશુપાલન વિભાગ તુરંત હરકતમાં આવ્યું છે. રાજકોટ, ગોંડલ અને કોટડાસાંગાણી સહિતના વિસ્તારોમાંથી પશુ ડોક્ટરોની એક વિશેષ ટીમ સાંઢવાયાની ગૌશાળાએ પહોંચી ગઈ છે. આ ટીમે તાત્કાલિક અસરગ્રસ્ત અન્ય પશુઓની સારવાર શરૂ કરી દીધી છે, જેથી મૃત્યુઆંક વધુ ન વધે.
ગાયોના મોતનું ચોક્કસ કારણ જાણવા માટે પોસ્ટમોર્ટમની કાયદેસરની કાર્યવાહી શરૂ કરવામાં આવી છે. આ ઉપરાંત, શંકાસ્પદ ઘાસચારાના મહત્ત્વના સેમ્પલ પણ પરીક્ષણ માટે લેવામાં આવ્યા છે.
પ્રાથમિક તારણ: ફૂડ પોઈઝનિંગની આશંકા
ડોક્ટરોના પ્રાથમિક તપાસના આધારે, ગાયોના મોતનું મુખ્ય કારણ ફૂડ પોઈઝનિંગ હોવાનું તારણ કાઢવામાં આવ્યું છે. જોકે, પોલીસ અને પશુપાલન વિભાગ દ્વારા આ ઘટના પાછળ કોઈ ચોક્કસ કારણ અથવા અન્ય કોઈ પરિબળ જવાબદાર છે કે કેમ, તે અંગે ઊંડાણપૂર્વકની તપાસ હાથ ધરવામાં આવી છે.

રાજકોટ ગૌશાળા ગાયોના મોત

કોટડાસાંગાણીના સાંઢવાયા ગામે ફૂડ પોઈઝનિંગની આશંકા, સમગ્ર વિસ્તારમાં અરેરાટી

December 13, 2025 | 18:06 IST