જૂનાગઢ જિલ્લાના મેંદરડા નજીક આજે એક અત્યંત કરુણ અને ગમખ્વાર માર્ગ અકસ્માત સર્જાયો હતો. મેંદરડાના અમરાપુર અને ચાંદ્રાવાડી વચ્ચેના માર્ગ પર એક વળાંકમાં i20 કાર પરથી ડ્રાઇવરે નિયંત્રણ ગુમાવતા કાર સીધી નદીમાં ખાબકી હતી. આ કારમાં લગ્નપ્રસંગમાં આવેલા પાંચ યુવાન મિત્રો સવાર હતા.
આ અકસ્માતમાં કારમાં સવાર બે મિત્રોના ઘટનાસ્થળે જ કરુણ મોત નીપજ્યા હતા, જ્યારે અન્ય ત્રણ મિત્રો ગંભીર રીતે ઇજાગ્રસ્ત થયા હતા. લગ્નની ખુશીના માહોલ વચ્ચે મિત્રોના મોતથી ગઢાળી ગામમાં શોકનો માહોલ છવાઈ ગયો છે.
કપડાં લેવા જતા યુવકોને નડ્યો કાળ
મળતી માહિતી મુજબ, મેંદરડાના ગઢાળી ગામે લગ્નપ્રસંગ હતો. આ લગ્નમાં વરરાજાના મિત્રો પણ સામેલ થવા આવ્યા હતા. લગ્નની તૈયારીના ભાગરૂપે આ પાંચ મિત્રો બપોરના સમયે કપડાં લેવા માટે ગઢાળીથી મેંદરડા જઈ રહ્યા હતા. આ દરમિયાન અમરાપુર-ચાંદ્રાવાડી વચ્ચેના રોડ પર વળાંકમાં કારનો અકસ્માત થયો હતો.
અકસ્માતમાં મૃત્યુ પામેલા મિત્રોની ઓળખ મહિપાલ અશોકભાઈ કુબાવત (ચંદ્રવાડા) અને કિશન લખમણભાઇ કાવાણી તરીકે થઈ છે.
ત્રણ મિત્રો સારવાર હેઠળ
કારમાં સવાર અન્ય ત્રણ મિત્રો ધ્રુવીક પટેલ (જૂનાગઢ), વિમલ ધનસુખભાઈ રાણપરીયા અને જયમિક મુકેશભાઈ પ્રજાપતિને ગંભીર ઇજાઓ થઈ હતી. તેમને તાત્કાલિક સારવાર માટે મેંદરડા અને જૂનાગઢની સરકારી હોસ્પિટલમાં ખસેડવામાં આવ્યા છે.
ઘટનાની જાણ થતા જ મેંદરડા પોલીસ તાત્કાલિક સ્થળ પર દોડી ગઈ હતી અને જરૂરી કાયદેસરની કાર્યવાહી હાથ ધરી હતી. ગઢાળી ગામે જ જ્યાં લગ્નનો આનંદ ઉત્સવ છવાયો હતો, ત્યાં વરરાજાના મિત્રોને નડેલા આ અકસ્માતને કારણે ખુશીનો માહોલ એક જ ક્ષણમાં ગમગીની અને શોકમાં ફેરવાઈ ગયો હતો.

જૂનાગઢમાં વરરાજાના મિત્રોને અકસ્માત નડ્યો

કપડાં લેવા જતા યુવકોને અકસ્માત નડ્યો, પાંચમાંથી ત્રણ મિત્રો ગંભીર રીતે ઘાયલ- 2ના મોત

November 25, 2025 | 17:44 IST