અમદાવાદમાં 148મી રથયાત્રા પરંપરાગત રીતે નીકળશે, અફવાઓને મંદિર પ્રશાસને નકારી

અમદાવાદ રથયાત્રા 2025 ભક્તિ અને ભવ્યતાથી ભરપૂર ભગવાન જગન્નાથની 148મી રથયાત્રા હવે ગણતરીના દિવસોમાં છે. રથયાત્રાને લઈને આજ રોજ રાજ્યના ગૃહમંત્રી, DGP, પોલીસ કમિશનર અને જગન્નાથ મંદિર ટ્રસ્ટની મહત્વની બેઠક યોજાઈ હતી.

આ બેઠકમાં મંદિર પ્રશાસને એ સ્પષ્ટ કર્યુ કે, રથયાત્રા ‘સાદગીપૂર્વક’ નીકળશે એવી જે વાતો પ્રસરાઈ રહી છે, તે સંપૂર્ણપણે અફવા છે. રથયાત્રા હંમેશાની જેમ જ ધામધૂમથી અને પરંપરાગત રૂટ પર જ યોજાશે.

148મી રથયાત્રાની વિશેષતા

148મી રથયાત્રામાં 101 ટ્રક, 18 હાથી, 30 અખાડા, પરંપરાગત 14 કિલોમીટરના રૂટ પર યાત્રા કરશે. જગન્નાથ મંદિરના ટ્રસ્ટી મહેન્દ્ર ઝાએ જણાવ્યું કે, “દર વર્ષની જેમ આ વખતે પણ રથયાત્રાનું આયોજન રંગીન અને ભવ્ય રીતે થશે.” હાલમાં સરકાર તરફથી ટ્રક અને અખાડા માટે મંજૂરી મળવાની પ્રક્રિયામાં છે.

મહાનગરપાલિકા દ્વારા તૈયારીઓ અમદાવાદના મેયર પ્રતિભા જૈને જણાવ્યું કે, 14 કિલોમીટરના યાત્રામાર્ગ પર રિસર્ફેસિંગ, લાઈટિંગ, ટ્રીમિંગ અને સફાઈના કામો ચાલી રહ્યા છે. પાણીની પરબો, ફાયરબ્રિગેડ અને આરોગ્ય સુવિધાઓ પૂરી પાડવામાં આવશે. રૂટને હેરિટેજ લુક આપવામાં આવશે. માત્ર મંદિરથી AMC દાણાપીઠ સુધીના રૂટનું નિરીક્ષણ પૂરું થયું. 525 જર્જરિત મકાનોને નોટિસ, જેમાંથી 22 મકાનો તોડી પાડવામાં આવ્યા છે, 50 પર કામગીરી ચાલુ છે.

જગન્નાથજીના રથનો શણગાર

મંદિર પરિસરમાં હાલમાં સફાઈ, શણગાર અને રથોને રંગરોગાન આપવામાં આવી રહ્યો છે. શ્રી જગન્નાથજી, સુભદ્રાજી અને બલભદ્રજીના રથોને નવરંગ રૂપ આપવામાં આવી રહ્યું છે. નગરજનોમાં પણ ભારે ઉત્સાહનો માહોલ છે.