ફરી 'સબ સલામત'ના દાવા પોકળઃ રાઇડ તૂટતાં દંપતી ઘાયલ

સરકારના 'સબ સલામત'ના દાવાઓ ફરી એકવાર પોકળ સાબિત થયા છે. રાજકોટ જિલ્લાના જેતપુરમાં દીવાળી નિમિત્તે રોટરી ક્લબ દ્વારા આયોજિત ફનફેર મેળામાં એક ગંભીર દુર્ઘટના સર્જાઈ છે. મેળામાં ચાલતી 'બ્રેક ડાન્સ' નામની રાઇડ્સ અચાનક તૂટી પડતાં તેમાં સવાર ધવલ મંડલી અને ગાયત્રી મંડલી નામના દંપતીને ગંભીર ઇજા પહોંચી છે.

દુર્ઘટના બાદ તાત્કાલિક બંને ઇજાગ્રસ્ત દંપતીને જેતપુરની સિવિલ હોસ્પિટલમાં ખસેડવામાં આવ્યા હતા, જ્યાં પ્રાથમિક સારવાર અપાયા બાદ તેમને વધુ સારવાર અર્થે જૂનાગઢ રિફર કરવામાં આવ્યા છે. ઘટનાની જાણ થતાં જેતપુર સિટી પોલીસે તુરંત કાર્યવાહી કરીને ફનફેર મેળો બંધ કરાવી દીધો છે અને રાઇડ્સની સુરક્ષા અને મંજૂરી અંગેની તપાસ હાથ ધરી છે.

તંત્ર અને પોલીસની કામગીરી સામે સવાલ:

જોકે, આ ગંભીર દુર્ઘટનાએ ફરી એકવાર તંત્ર અને પોલીસની કામગીરી સામે મોટા સવાલો ઊભા કર્યા છે. રાજ્યમાં અગાઉ પણ મેળાની રાઇડ્સ તૂટી પડવાની અનેક ઘટનાઓ બની ચૂકી છે, છતાં તંત્ર દ્વારા શા માટે કોઈ કડક પગલાં લેવાતા નથી?

સવાલ એ થાય છે કે, શું પોલીસ અને સ્થાનિક વહીવટી તંત્ર માત્ર કાગળ પર જ ગાઇડલાઇનો બનાવીને અને નિયમો ઘડીને સંતોષ માને છે? રાઇડ્સને મેળામાં ચલાવવાની મંજૂરી આપતા પહેલાં શું ખરેખર તેના ફિટનેસ સર્ટિફિકેટ અને સલામતીના ધોરણોની યોગ્ય ચકાસણી કરવામાં આવી હતી? શું જવાબદાર અધિકારીઓએ સ્થળ પર જઈને જાતે નિરીક્ષણ કર્યું હતું?

વારંવાર બનતી આવી દુર્ઘટનાઓ સ્પષ્ટ દર્શાવે છે કે, લોકોની સુરક્ષાના મામલે તંત્ર ગંભીર બેદરકારી દાખવી રહ્યું છે. જ્યાં સુધી નિયમોનું કડક અને ઇમાનદારીપૂર્વક પાલન કરાવવામાં નહીં આવે, ત્યાં સુધી તહેવારોના ઉત્સાહમાં આવી ઘટનાઓ બનતી રહેશે અને નિર્દોષ નાગરિકો તેનો ભોગ બનતા રહેશે. સરકારે માત્ર નિવેદનો આપવાને બદલે રાઇડ્સના સંચાલકો તેમજ બેદરકાર અધિકારીઓ સામે કડક કાર્યવાહી કરીને દાખલો બેસાડવો જોઈએ.