કચ્છ પાસે ભારત-પાકિસ્તાનની બોર્ડર ઉપર બે જવાનોના મોત

ગુજરાતના કચ્છ જિલ્લાને અડીને આવેલી ભારત-પાકિસ્તાન સરહદ ઉપર હરામી નાળા પાસે શુક્રવારે કાદવમાં ફસાયેલા BSFના આસિસ્ટન્ટ કમાન્ડન્ટ અને હેડ કોન્સ્ટેબલનું ડિહાઈડ્રેશનના કારણે મોત થયુ છે. પેટ્રોલિંગ દરમિયાન ભીષણ ગરમીમાં પીવાનું પાણી ખતમ થઈ ગયુ હતુ. કાદવમાં ફસાયેલા જવાનોને આઉટ પોસ્ટથી પાણી અને ORS પહોંચાડવામાં મોડુ થઈ ગયુ હતુ. બેભાન હાલતમાં બંને જવાનોને નજીકની હોસ્પિટલમાં લઈ જવામાં આવ્યા ત્યારે તેમનું મોત થઈ ચુક્યુ હતુ.

 

સીમા સુરક્ષા દળ, ગુજરાતના જનસંપર્ક અધિકારીએ આ સમાચારની પુષ્ટિ કરી છે. BSFના સત્તાવાર સૂત્રો પાસેથી મળેલી માહિતી મુજબ BSFના આસિસ્ટન્ટ કમાન્ડન્ટ એચ. વિશ્વદેવ અને હેડ કોન્સ્ટેબલ દયાલરામ ટીમ સાથે હરામીનાળાની ઉત્તર દિશામાં આંતરરાષ્ટ્રીય સરહદ ઉપર દુર્ગમ વિસ્તારમાં પેટ્રોલિંગ પર ગયા ત્યારે આ ઘટના બની છે. આ વિસ્તાર ખતરનાક વિસ્તાર ગણાય છે. તે સમયે હવામાનની વિષમ પરિસ્થિતિમાં તેઓ ફસાઈ ગયા હતા. તેઓને તાત્કાલિક સારવારની જરૂર હતી. પરંતુ નજીકની હોસ્પિટલમાં ખસેડાયા ત્યારે બંને જવાનોના મોત થયા હતા.

 

કચ્છમાં BSFની 59 બટાલિયનમાં તૈનાત આસિસ્ટન્ટ કમાન્ડન્ટ વિશ્વ દેવા રમણનાથ ઝા બિહારના અને હેડ કોન્સ્ટેબલ દયાલરામ ઉત્તરાખંડના રહેવાસી હતી. શુક્રવારે બોર્ડર આઉટ પોસ્ટ 1136ના વિસ્તારમાં 6 સૈનિકોની ટીમ પેટ્રોલિંગ પર નીકળી હતી. સવારથી નીકળેલી ટીમ કાદવમાં ફસાયા બાદ પીવાનું પાણી નહી મળતા બેભાન થઈ ગયા હતા.