સુરેન્દ્રનગરના દેદાદરા પાસે કારમાં આઠ લોકો ભડથું

સુરેન્દ્રનગર જિલ્લાના વઢવાણ-લખતર હાઈવે ઉપર દેદાદરા ગામ પાસે ગમખ્વાર અકસ્માત સર્જાતા 8 લોકોના મોત થયા છે. બે કાર વચ્ચે અકસ્માત થયા બાદ એક કારમાં આગ લાગતાં કારમાં સવાર તમામ લોકો જીવતા ભૂંજાઈ ગયા હતા. ઘટના સ્થળે પહોંચીને પોલીસ તેમજ 108 એમ્બ્યુલન્સ ટીમે બચાવવાના કરેલા પ્રયાસ નિષ્ફળ ગયા હતા. ઘટનામાં ઈજાગ્રસ્ત એક વ્યક્તિને સુરેન્દ્રનગરની હોસ્પિટલમાં સારવાર માટે ખસેડાયા છે. 

વઢવાણ-લખતર હાઇવે પર બે કાર વચ્ચે અકસ્માત થયો હતો. બાદમાં અકસ્માતગ્રસ્ત કારમાં આગ લાગતા બે બાળકો સહિત 8 લોકો જીવતા ભૂંજાયા હતા. ગોઝારી ઘટનાના પગલે હાઈવે પર લોકોના ટોળા એકઠાં થતાં ટ્રાફિક જામ થયો હતો.

ઝમર અને દેદાદરા ગામ વચ્ચે ટાટા હેરિયર અને સ્વિફ્ટ ડિઝાયર કાર વચ્ચે અકસ્માત સર્જાયા બાદ સ્વિફ્ટ કાર રોડની સાઈડમાં ખાબકી હતી. ત્યારબાદ સ્વિફ્ટ કારમાં આગ લાગી હતી. કાર સળગી જતાં તેમાં સવાર આઠ લોકોના મોત થયા હતા. ધંધુકા તાલુકાના ઝીંઝર ગામનો પરિવાર અને લખતર તાલુકાના કડુ ગામના તેમના સંબંધીઓ કારમાં સવાર હતા. જ્યારે એક વ્યક્તિને ઇજાગ્રસ્ત હાલતમાં સારવાર અર્થે સુરેન્દ્રનગર હોસ્પિટલમાં ખસેડવામાં આવ્યો છે.

અકસ્માતમાં મોતને ભેટેલા સગા-સંબંધીઓ સ્વિફ્ટ ડિઝાયર કારમાં કડુથી સુરેન્દ્રનગર જઈ રહ્યા હતાં. ત્યારે હેરિયર કાર સાથે ટક્કર થયા બાદ સ્વિફ્ટ કાર રોડ નીચે ઉતરી હતી અને બાદ સ્વિફ્ટમાં ભયાનક આગ લાગી હતી. સુરેન્દ્રનગર ગાંધી હોસ્પિટલ ખાતે તમામ મૃતકોના પોસ્ટ મોર્ટમની કાર્યવાહી કરવામાં આવી હતી.

અકસ્માતની જાણ થતાં ફાયર બ્રિગેડની ટીમ તાત્કાલિક ઘટના સ્થળે પહોંચી હતી. ઘટના સ્થળે દોડી આવેલા લોકોએ ઈજાગ્રસ્તોને 108 એમ્બ્યુલન્સ વાનમાં સારવાર અર્થે હોસ્પિટલ ખસેડ્યા હતા. લખતર પોલીસે ઘટના સ્થળે પહોંચી બચાવ કામગીરી બાદ અકસ્માતની ઘટના સંદર્ભે તપાસ હાથ ધરી હતી.

મૃતકોના નામ

1. મીનાબા વિરેન્દ્રસિંહ રાણા (કડુ)

2. કૈલાબા જગદીશસિંહ ચુડાસમા (ઝીંઝર, હાલ-ભાવનગર)

3. રાજેશ્રીબા નરેન્દ્રસિંહ રાણા (કડુ)

4. દિવ્યાબા હરદેવસિંહ જાડેજા (કચ્છ)

5.  નીતાબા ભગીરથસિંહ જાડેજા (જામનગર)

6. પ્રતિપાલસિંહ જગદીશસિંહ ચુડાસમા

7. રિદ્ધિબા પ્રતિપાલસિંહ

8. દિવ્યેશ્રીબા પ્રતિપાલસિંહ