ભારતીય ક્રિકેટર વિરાટ કોહલી અને બોલિવૂડ અભિનેત્રી અનુષ્કા શર્મા ફરી એકવાર આધ્યાત્મિક માર્ગે જોવા મળ્યા છે. મંગળવારે વહેલી સવારે આ સ્ટાર દંપતી વૃંદાવન સ્થિત સંત પ્રેમાનંદ મહારાજના આશ્રમ 'કેલી કુંજ' ખાતે દર્શન માટે પહોંચ્યું હતું. વર્ષ 2026માં આ દંપતીની આ પ્રથમ આધ્યાત્મિક મુલાકાત છે.
વહેલી સવારે સત્સંગનો લ્હાવો :&nbsp;
વિરાટ અને અનુષ્કા સવારે 5 વાગ્યે જ આશ્રમમાં હાજર થઈ ગયા હતા. એક કલાક સુધી ચાલેલા સત્સંગ દરમિયાન બંનેએ અત્યંત સાદગી બતાવી હતી. કોઈ પણ વીઆઈપી સુવિધા વગર તેઓ સામાન્ય શ્રદ્ધાળુઓની જેમ જમીન પર હાથ જોડીને બેઠા હતા અને મહારાજજીના પ્રવચનો સાંભળ્યા હતા. આ પ્રસંગે તેમની પુત્રી વામિકા તેમની સાથે જોવા મળી ન હતી.
આશ્રમ સાથે જૂનો નાતો :&nbsp;
ઉલ્લેખનીય છે કે, વિરાટ અને અનુષ્કા માટે વૃંદાવન સાથેનો આ લગાવ નવો નથી. વર્ષ 2025 દરમિયાન પણ તેઓએ ત્રણ વખત આ આશ્રમની મુલાકાત લીધી હતી. સોમવારે બપોરે 3 વાગ્યે તેઓ વૃંદાવન પહોંચ્યા હતા અને સ્થાનિક હોટેલમાં રોકાણ કર્યા બાદ વહેલી સવારે ગુરુજીના દર્શને પહોંચ્યા હતા.
દર્શન બાદ દિલ્હી રવાના :&nbsp;
સત્સંગ પૂર્ણ થયા બાદ દંપતીએ સંત પ્રેમાનંદ મહારાજ પાસેથી વ્યક્તિગત આશીર્વાદ મેળવ્યા હતા. આધ્યાત્મિક શાંતિ મેળવ્યા બાદ તેઓ મથુરાથી સીધા દિલ્હી પરત ફર્યા હતા. સોશિયલ મીડિયા પર તેમની આ મુલાકાતની તસવીરો ખૂબ વાયરલ થઈ રહી છે, જેમાં વિરાટ અને અનુષ્કાની નમ્રતાની ચાહકો પ્રશંસા કરી રહ્યા છે.

વિરાટ અનુષ્કા વૃંદાવન મુલાકાત

વિરાટ કોહલી અને અનુષ્કા શર્માએ સવારે 5 વાગ્યે વૃંદાવન આશ્રમમાં સત્સંગ સાંભળી આશીર્વાદ લીધા

February 17, 2026 | 14:36 IST