દિલ્હી પોલીસે દુષ્કર્મ કેસમાં પુણેથી ટીવી અભિનેતા આશિષ કપૂરની ધરપકડ કરી. ઉત્તર દિલ્હીના સિવિલ લાઈન્સ વિસ્તારમાં નોંધાયેલા દુષ્કર્મ કેસમાં દિલ્હી પોલીસે TV અભિનેતા આશિષ કપૂરની પુણેથી ધરપકડ કરી છે. 33 વર્ષીય અભિનેતા પર લગ્નના બહાને 27 વર્ષીય મહિલા પર દુષ્કર્મ કરવાનો આરોપ મૂકવામાં આવ્યો છે.
લગ્નનું વચન આપીને કર્યું શારીરિક શોષણ&nbsp;
પોલીસના જણાવ્યા અનુસાર, પીડિતાએ સિવિલ લાઈન્સ પોલીસ સ્ટેશનમાં ફરિયાદ નોંધાવી હતી કે, આશિષ કપૂરે લગ્નનું વચન આપીને તેનું ઘણી વખત શારીરિક શોષણ કર્યું હતું. પીડિતાનો દાવો છે કે, તેઓ થોડા વર્ષો પહેલા એક ટેલિવિઝન પ્રોજેક્ટ દરમિયાન મળ્યા હતા, ત્યારબાદ બન્ને મિત્ર બન્યા અને અભિનેતાએ તેની સાથે લગ્ન કરવાનું વચન આપ્યું હતું. જોકે, બાદમાં આશિષે લગ્ન કરવાનો ઈનકાર કર્યો હતો, ત્યારબાદ પીડિતાએ પોલીસમાં ફરિયાદ નોંધાવી હતી.
અભિનેતાને પૂછપરછ માટે દિલ્હી લાવવામાં આવ્યા
સૂત્રોના જણાવ્યા અનુસાર, દિલ્હી પોલીસની એક વિશેષ તપાસ ટીમે કેસની સંપૂર્ણ તપાસ કર્યા પછી આશિષ કપૂરને પુણેમાં તેના છુપાયેલા સ્થાન પરથી અટકાયતમાં લીધો હતો. અભિનેતાને પૂછપરછ માટે દિલ્હી લાવવામાં આવ્યો છે. પોલીસે જણાવ્યું હતું કે, પીડિતાની તબીબી તપાસ કરવામાં આવી છે અને કેસમાં પુરાવા એકત્રિત કરવામાં આવી રહ્યા છે. આ ઉપરાંત, અન્ય સંભવિત સાક્ષીઓની પણ પૂછપરછ કરવામાં આવી રહી છે.
અનેક લોકપ્રિય ધારાવાહિકોમાં અભિનય
આશિષ કપૂર ટેલિવિઝન ઉદ્યોગમાં એક જાણીતું નામ છે અને તેમણે ઘણી લોકપ્રિય ધારાવાહિકોમાં અભિનય કર્યો છે. પોલીસે કહ્યું છે કે, કેસની સંવેદનશીલતાને ધ્યાનમાં રાખીને ગુપ્તતા જાળવી રાખવી જોઈએ. પીડિતાના પરિવારે પોલીસ પાસે કડક કાર્યવાહીની માંગ કરી છે.
મનોરંજન જગતમાં મચ્યો ખળભળાટ
સિવિલ લાઈન્સ પોલીસ સ્ટેશનમાં ભારતીય દંડ સંહિતાની સંબંધિત કલમો હેઠળ કેસ નોંધવામાં આવ્યો છે. પોલીસે કહ્યું કે, તપાસ પૂર્ણ થયા પછી આગળની કાનૂની કાર્યવાહી કરવામાં આવશે. આ કેસથી મનોરંજન જગતમાં ખળભળાટ મચી ગયો છે, અને લોકો તેની પ્રગતિ પર નજર રાખી રહ્યા છે.

આશિષ કપૂરની દુષ્કર્મ કેસમાં ધરપકડ

દુષ્કર્મના મામલામાં ટીવી અભિનેતા આશિષ કપૂરની પુણેથી કરી ધરપકડ

September 4, 2025 | 16:59 IST