સોનાક્ષી-ઝહીરની ફિલ્મને પહેલા જ દિવસે ઝટકો! ‘તુ હૈ મેરી કિરણ’ની કેટલી કમાણી?

Tu Hai Meri Kiran Box Office Collection Day 1: સોનાક્ષી સિંહા અને ઝહીર ઇકબાલની રોમેન્ટિક સસ્પેન્સ-થ્રિલર ફિલ્મ ‘તુ હૈ મેરી કિરણ’ 23 ઓક્ટોબર, 2026ના રોજ સિનેમાઘરોમાં રિલીઝ થઈ છે. લાંબા વિરામ બાદ આ જોડી ફરી મોટા પડદા પર સાથે જોવા મળી રહી છે. જોકે, ફિલ્મને વિવેચકો અને દર્શકો તરફથી મિશ્ર પ્રતિસાદ મળ્યો છે અને શરૂઆતના બોક્સ ઓફિસ કલેક્શનના આંકડા પણ નિર્માતાઓની અપેક્ષા કરતાં નબળા હોવાનું સામે આવ્યું છે.

પહેલા દિવસે માત્ર ₹14 લાખની કમાણીનો અંદાજ
Sacnilkના પ્રારંભિક ટ્રેન્ડ રિપોર્ટ અનુસાર, ‘તુ હૈ મેરી કિરણ’એ રિલીઝના પહેલા દિવસે ભારતમાં અંદાજે ₹14 લાખનું નેટ કલેક્શન કર્યું હતું, જ્યારે ફિલ્મનું ગ્રોસ કલેક્શન આશરે ₹15 લાખ હોવાનું જણાવાયું છે. ફિલ્મની શરૂઆત નબળી રહેતાં હવે શનિવાર અને રવિવારના કલેક્શન પર નજર રહેશે. વીકએન્ડ દરમિયાન દર્શકોનો પ્રતિસાદ ફિલ્મની બોક્સ ઓફિસ કમાણીમાં કેટલો વધારો કરે છે, તે જોવાનું રહેશે.

શું છે ‘તુ હૈ મેરી કિરણ’ની વાર્તા?
‘તુ હૈ મેરી કિરણ’ એક મનોવૈજ્ઞાનિક સસ્પેન્સ-થ્રિલર છે, જેમાં સમય, રહસ્ય અને એક વ્યક્તિના વધતા જતા જુનુનની આસપાસ વાર્તા આગળ વધે છે. ફિલ્મમાં સોનાક્ષી સિંહા કિરણ મિત્તલ મલ્હોત્રાની ભૂમિકામાં છે, જે પોતાના પતિ રાયન સાથે જીવન વિતાવે છે. રાયનનું પાત્ર અંકિત ગુપ્તાએ ભજવ્યું છે. કિરણને એક દિવસ કબાટમાંથી જૂનો ફ્લિપ ફોન મળે છે. આ ફોન દ્વારા તેની વાતચીત સમર ખુરાના સાથે શરૂ થાય છે, જેની ભૂમિકામાં ઝહીર ઇકબાલ જોવા મળે છે. વાર્તામાં સૌથી મોટું રહસ્ય એ છે કે કિરણ વર્ષ 2026માં જીવે છે, જ્યારે સમર વર્ષ 2016માં છે. એટલે કે બંને વચ્ચે દસ વર્ષનું અંતર છે. શરૂઆતમાં સામાન્ય લાગતી વાતચીત ધીમે ધીમે રહસ્યમય વળાંક લે છે. સમરનો કિરણ પ્રત્યેનો લગાવ જુનુનમાં ફેરવાતો જાય છે. તે કિરણના ભૂતકાળમાં દખલ કરીને તેના વર્તમાનને બદલવાનો પ્રયાસ કરે છે. બ્લેકમેલ અને જોખમ વચ્ચે ફસાયેલી કિરણ માટે આ પરિસ્થિતિ વધુ જટિલ બની જાય છે.

ફિલ્મમાં કોણ કોણ છે?
ફિલ્મનું દિગ્દર્શન કરણ રાવલે કર્યું છે. સોનાક્ષી સિંહા અને ઝહીર ઇકબાલ ઉપરાંત અંકિત ગુપ્તા, ઝરીના વહાબ અને શર્લિન સેથ પણ મહત્વપૂર્ણ ભૂમિકાઓમાં છે. લગ્ન બાદ સોનાક્ષી અને ઝહીરની સાથે આવેલી આ ફિલ્મને લઈને શરૂઆતમાં ઉત્સુકતા હતી, પરંતુ પ્રથમ દિવસના પ્રારંભિક કલેક્શનથી ફિલ્મને બોક્સ ઓફિસ પર હજુ દર્શકોનો મજબૂત પ્રતિસાદ મેળવવાની જરૂર જણાય છે. હવે વીકએન્ડ દરમિયાન ફિલ્મની કમાણીમાં કેટલો ઉછાળો આવે છે અને દર્શકોનો પ્રતિસાદ કેવો રહે છે, તેના પર સૌની નજર રહેશે.