ધ ડાયરી ઓફ મણિપુર: મોનાલિસાનું ડેબ્યુ ટ્રેલર

મહાકુંભમાં માળા વેચતી વખતે સોશિયલ મીડિયા પર વાયરલ થયેલી મોનાલિસા હવે મોટા પડદા પર ધમાલ મચાવવા તૈયાર છે. તેની ડેબ્યુ ફિલ્મ 'ધ ડાયરી ઓફ મણિપુર'નું ટ્રેલર તાજેતરમાં સિવિલ લાઇન્સની એક હોટલમાં ભવ્ય રીતે લોન્ચ કરવામાં આવ્યું હતું. આ પ્રસંગે ફિલ્મની સ્ટારકાસ્ટ અને નિર્દેશક સનોજ મિશ્રા ખાસ ઉપસ્થિત રહ્યા હતા.

ફિલ્મની વાર્તા અને પાત્ર :

આ ફિલ્મમાં મોનાલિસા એક આર્મી ઓફિસરની પુત્રીની મુખ્ય ભૂમિકા ભજવી રહી છે. વાર્તામાં એક દીકરીનો સંઘર્ષ અને તેની સુંદર લવ સ્ટોરી વણી લેવામાં આવી છે. ખાસ વાત એ છે કે કોઈ પણ પ્રકારની એક્ટિંગ ટ્રેનિંગ વગર પણ મોનાલિસાએ ટ્રેલરમાં પ્રભાવશાળી અભિનય કર્યો છે. ટ્રેલરમાં મણિપુરની પ્રાકૃતિક સુંદરતા વચ્ચે રહેતી એક નિર્દોષ છોકરીની જિંદગીમાં આવતા તોફાનને દર્શાવવામાં આવ્યું છે.

મણિપુર હિંસા અને રાજકારણનો વળાંક : 

ફિલ્મ માત્ર પ્રેમકથા પૂરતી મર્યાદિત નથી, પરંતુ તેમાં મણિપુરના વાસ્તવિક મુદ્દાઓ જેવા કે કુકી અને મૈતેઈ સમુદાય વચ્ચેનો વિવાદ, ધર્મ પરિવર્તન અને અનામતની રાજનીતિને પણ વણી લેવામાં આવી છે. આ ગંભીર સામાજિક યુદ્ધ વચ્ચે માનવતાના પક્ષે ઊભેલી નાયિકાની સફર આ ફિલ્મનો મુખ્ય આધાર છે.

શૂટિંગ અને બજેટ : 

આશરે 10 કરોડના બજેટમાં બનેલી આ ફિલ્મનું શૂટિંગ નેપાળ, મણિપુર અને ઉત્તર પ્રદેશના વિવિધ લોકેશન પર કરવામાં આવ્યું છે. મે 2025માં શરૂ થયેલું આ પ્રોજેક્ટ ચાર શેડ્યૂલમાં પૂર્ણ થયો છે. અઢી કલાકની આ ફિલ્મમાં કુલ પાંચ ગીતો છે અને તે એપ્રિલના પ્રથમ સપ્તાહમાં સિનેમાઘરોમાં રિલીઝ થવા જઈ રહી છે.

લોન્ચિંગ સમયે વિવાદ :

નિર્દેશક સનોજ મિશ્રા આ ટ્રેલરને માઘ મેળામાં લોન્ચ કરવા ઈચ્છતા હતા, પરંતુ વહીવટીતંત્ર દ્વારા સુરક્ષાના કારણોસર મંજૂરી ન મળતા તેમણે નારાજગી વ્યક્ત કરી હતી. તેમણે આ કાર્યને સનાતન ધર્મ અને દેશસેવા સાથે જોડીને પોતાનો પક્ષ રજૂ કર્યો હતો