બોલિવૂડના જાણીતા કોમેડિયન રાજપાલ યાદવ હાલમાં કાયદાકીય અને આર્થિક મુશ્કેલીઓમાં ઘેરાયેલા છે. વર્ષો જૂના ચેક બાઉન્સ કેસમાં દિલ્હી હાઈકોર્ટે રાહત આપવાનો ઈનકાર કર્યા બાદ, અભિનેતાએ તાજેતરમાં તિહાડ જેલમાં આત્મસમર્પણ કર્યું છે. આ મુશ્કેલ સમયમાં બિહારના પૂર્વ મુખ્યમંત્રી લાલુ પ્રસાદ યાદવના પુત્ર તેજ પ્રતાપ યાદવ અને અભિનેતા સોનુ સૂદ તેમની વહારે આવ્યા છે.
તેજ પ્રતાપ યાદવ દ્વારા ₹11 લાખની સહાય :&nbsp;
જન શક્તિ જનતા દળના રાષ્ટ્રીય અધ્યક્ષ તેજ પ્રતાપ યાદવે માનવીય અભિગમ દાખવીને રાજપાલ યાદવના પરિવારને ₹11,00,000 ની આર્થિક મદદ પૂરી પાડી છે. સોશિયલ મીડિયા દ્વારા આ જાણકારી શેર કરતા તેમણે જણાવ્યું હતું કે, જે કલાકારે વર્ષો સુધી દેશના લોકોને હસાવ્યા છે, તેમના પરિવારને આવા મુશ્કેલ સમયમાં એકલા ન છોડવા જોઈએ. આ મદદ સંપૂર્ણપણે સંવેદનાના આધારે કરવામાં આવી છે અને તેનો કોઈ રાજકીય હેતુ નથી. રાજપાલ યાદવના પરિવારે પણ આ કપરા સમયમાં મળેલા માનસિક અને આર્થિક ટેકા બદલ તેજ પ્રતાપનો આભાર માન્યો છે.
ચેક બાઉન્સ કેસમાં 6 મહિનાની સજા :&nbsp;
રાજપાલ યાદવ પર આશરે ₹9 કરોડના દેવા અને ચેક બાઉન્સના ગંભીર આક્ષેપો છે. આ મામલે અદાલતે તેમને 6 મહિનાની કેદની સજા ફટકારી છે. તેમણે ભંડોળની વ્યવસ્થા કરવા માટે કોર્ટ પાસે સમય માંગ્યો હતો, પરંતુ તેમની અરજી ફગાવી દેવામાં આવતા આખરે તેમણે જેલવાસ ભોગવવો પડી રહ્યો છે. આ સમાચાર બાદ સિને જગત અને તેમના લાખો ચાહકોમાં ચિંતા જોવા મળી હતી.
સોનુ સૂદ બન્યા દેવદૂત :&nbsp;
કોરોના કાળથી લોકોની મદદ માટે જાણીતા બનેલા સોનુ સૂદે પણ રાજપાલ યાદવને આર્થિક સંકટમાંથી બહાર લાવવા હાથ લંબાવ્યો છે. સોનુ સૂદે રાજપાલને એક નવી ફિલ્મની ઓફર આપી છે. આ સાથે જ તેમણે જેલમાં રહેલા અભિનેતાને સાઈનિંગ અમાઉન્ટ પણ આપવાની ખાતરી આપી છે, જેથી તેમનું દેવું ચૂકવવામાં અને પરિવારને મદદ કરવામાં સરળતા રહે. ફિલ્મ ઇન્ડસ્ટ્રીના અનેક લોકોએ આ પહેલની પ્રશંસા કરી છે.

રાજપાલ યાદવને આર્થિક મદદ

જેલના સળિયા પાછળ રહેલા કોમેડિયન રાજપાલ યાદવના પરિવારને ₹11 લાખની સહાય અને નવી ફિલ્મની ઓફર

February 11, 2026 | 12:40 IST