રાજામૌલીની 'વારાણસી': 1200 કરોડનું પૌરાણિક સાહસ

ભારતીય સિનેમાના દિગ્ગજ ડાયરેક્ટર એસ.એસ. રાજામૌલી ફરી એકવાર ઇતિહાસ રચવા જઈ રહ્યા છે. તેમની આગામી મહાકાય ફિલ્મ 'વારાણસી' અત્યારથી જ ચર્ચાનું કેન્દ્ર બની છે. આ ફિલ્મમાં સાઉથ સુપરસ્ટાર મહેશ બાબુની સાથે પ્રિયંકા ચોપરા અને પૃથ્વીરાજ સુકુમારન મુખ્ય ભૂમિકામાં જોવા મળશે.

રામાયણ સાથેનું ખાસ કનેક્શન : 

રાજામૌલીની ફિલ્મો હંમેશા ભારતીય સંસ્કૃતિ અને મહાકાવ્યોની ઝલક રજૂ કરે છે. 'વારાણસી' વિશે વાત કરતા ડાયરેક્ટરે સ્પષ્ટ કર્યું છે કે આ પ્રોજેક્ટ સીધો રામાયણથી પ્રેરિત છે. તેમણે ફિલ્મમાં રામાયણના એક મહત્વપૂર્ણ એપિસોડને આધુનિક શૈલીમાં વણી લીધો છે, જે પ્રેક્ષકો માટે એક અનોખો અનુભવ બની રહેશે.

25 મિનિટનો દિલધડક સીન અને 60 દિવસનું શૂટિંગ : 

આ ફિલ્મની સૌથી મોટી વિશેષતા તેમાં આવતો 25 મિનિટનો એક ગ્રાન્ડ બેટલ સીન છે. આ સિક્વન્સને તૈયાર કરવામાં મેકર્સને ખૂબ જ પરસેવો પાડવો પડ્યો છે. રાજામૌલીના જણાવ્યા અનુસાર, આ 25 મિનિટના સીનને શૂટ કરવામાં પૂરા 60 દિવસનો સમય લાગ્યો હતો. આ સીન રામાયણની વિવિધ ઘટનાઓનું મિશ્રણ છે જે યુદ્ધના મેદાનમાં એકસાથે જોવા મળશે.

ફિલ્મનું બજેટ અને રિલીઝ ડેટ : 

'વારાણસી' ભારતીય સિનેમાની સૌથી મોંઘી ફિલ્મોમાંની એક હશે, જેનું અંદાજિત બજેટ 1200 કરોડ રૂપિયા હોવાનું મનાય છે. આ ફિલ્મ 7 એપ્રિલ, 2027ના રોજ સિનેમાઘરોમાં દસ્તક દેશે. તાજેતરમાં રિલીઝ થયેલા ટીઝરમાં વારાણસી શહેરની ભવ્યતા અને પૃથ્વી તરફ આવતા ઉલ્કાપિંડના દ્રશ્યોએ ચાહકોમાં ભારે ઉત્સુકતા જગાડી છે.