એરપોર્ટ પર મુખ્યમંત્રીના પુત્રને મળ્યા

બોલિવૂડની સૌથી સુંદર અને હસમુખી અભિનેત્રીઓમાંની એક, જેનિલિયા ડિસૂઝા, આજે એટલે કે 5મી ઑગસ્ટના રોજ પોતાનો 38મો જન્મદિવસ ઉજવી રહી છે. તેણે માત્ર હિન્દી જ નહીં, પરંતુ સાઉથ અને મરાઠી સિનેમામાં પણ પોતાની એક્ટિંગનો જાદુ ચલાવ્યો છે. ખાસ વાત એ છે કે તેની પહેલી ફિલ્મનો હીરો જ તેના જીવનનો હીરો બન્યો, અને આજે તેઓ બોલિવૂડના સૌથી સુખી કપલ્સમાંથી એક છે.

ખેલકૂદના મેદાનથી ફિલ્મોની દુનિયા સુધી

5 ઓગસ્ટ, 1987ના રોજ એક મેંગ્લોરિયન કેથોલિક પરિવારમાં જન્મેલી જેનિલિયા બાળપણથી જ બહુ પ્રતિભાશાળી હતી. તે શાળાના દિવસોમાં સ્ટેટ લેવલની એથલીટ અને નેશનલ લેવલની ફૂટબોલ ખેલાડી હતી. તેમ છતાં, તેણે સ્પોર્ટ્સના બદલે અભિનયની દુનિયા પસંદ કરી. અમિતાભ બચ્ચન સાથેની એક જાહેરાતે તેની કિસ્મત ચમકાવી અને તેને ફિલ્મોના ઑફર્સ મળવા લાગ્યા.

એક અનોખી લવ સ્ટોરી

જેનિલિયા અને રિતેશ દેશમુખની પ્રેમ કહાની કોઈ ફિલ્મની સ્ક્રિપ્ટથી ઓછી નથી. રિતેશ મહારાષ્ટ્રના પૂર્વ મુખ્યમંત્રી સ્વર્ગીય વિલાસરાવ દેશમુખના પુત્ર છે. બંનેની પહેલી મુલાકાત 2003માં તેમની ડેબ્યુ ફિલ્મ 'તુઝે મેરી કસમ'ના ટેસ્ટ શૂટ દરમિયાન હૈદરાબાદ એરપોર્ટ પર થઈ હતી.

રિતેશે પોતે આ ઘટના યાદ કરતા કહ્યું હતું કે, "હું એરપોર્ટ પર પહોંચ્યો, ત્યારે મારી નજર એક લાંબી છોકરી પર પડી જે મારી સામે જોયા વગર મને ઇગ્નોર કરી રહી હતી." બીજી બાજુ, જેનિલિયાને લાગતું હતું કે મુખ્યમંત્રીનો પુત્ર હોવાથી રિતેશમાં ઘમંડ હશે, તેથી તેણે એટીટ્યુડ બતાવવાનું નક્કી કર્યું. જોકે, ફિલ્મની શૂટિંગ દરમિયાન બંને એકબીજાને ઓળખ્યા અને જેનિલિયાને સમજાયું કે રિતેશ બિલકુલ અલગ છે. ધીમે ધીમે તેમની મિત્રતા પ્રેમમાં ફેરવાઈ ગઈ. લગભગ 9 વર્ષ સુધી રિલેશનશીપમાં રહ્યા બાદ, 2012માં તેમણે હિન્દુ અને ખ્રિસ્તી રીતિ-રિવાજો મુજબ લગ્ન કરી લીધા.

કરિયરને છોડી પરિવારને આપ્યું પ્રાધાન્ય

લગ્ન પછી જેનિલિયાએ પોતાના સુંદર કરિયરને બાજુ પર મૂકીને પરિવારને પ્રાધાન્ય આપ્યું. લગ્ન પહેલા તેણે 'જાને તુ યા જાને ના', 'ફોર્સ' અને 'હેપ્પી' જેવી ઘણી હિટ ફિલ્મો આપી હતી, પરંતુ બાળકોના ઉછેર માટે તેણે એક્ટિંગમાંથી બ્રેક લીધો. લગભગ 10 વર્ષ પછી, 2022માં તેણે પોતાના પતિ સાથે મરાઠી ફિલ્મ 'વેડ'થી કમબેક કર્યું, જેણે બોક્સ ઓફિસ પર ધૂમ મચાવી. તાજેતરમાં તે આમિર ખાન સાથે 'સિતારે જમીન પર'માં પણ જોવા મળી હતી.

જેનિલિયાએ પોતાની પારિવારિક જવાબદારીઓ અને અંગત જીવનને હંમેશા ટોચ પર રાખીને એક નવી મિસાલ કાયમ કરી છે.