કેન્સર સામેની લડાઈમાં KGFના અભિનેતા હરીશ રાયનું દુઃખદ નિધન : 
કન્નડ ફિલ્મના દિગ્ગજ અભિનેતા હરીશ રાયનું લાંબી બીમારી બાદ દુઃખદ નિધન થતાં સમગ્ર ફિલ્મ ઉદ્યોગમાં શોકની લાગણી છવાઈ ગઈ છે. હરીશ રાય ફિલ્મ KGF માં રોકીના કાકા કાસિમ ચાચાની ભૂમિકા ભજવીને ખૂબ લોકપ્રિય થયા હતા. કહેવાઈ રહ્યું છે કે તેઓ લાંબા સમયથી કેન્સર સામે ઝૂઝી રહ્યા હતા. તેમણે બેંગલુરુની કિદવઈ હોસ્પિટલમાં અંતિમ શ્વાસ લીધા હતા.
KGF 2ના શૂટિંગ દરમિયાન બીમારી છુપાવી :&nbsp;
અહેવાલો અનુસાર, હરીશ રાયને થાઇરોઇડ કેન્સર હતું, જે તેમના પેટ સુધી ફેલાઈ ગયું હતું. આ બીમારીને કારણે તેઓ અત્યંત નબળા પડી ગયા હતા અને તેમના પેટમાં પાણી ભરાઈ ગયું હતું. હરીશ રાયે પોતે જ આ વાતનો ખુલાસો કર્યો હતો કે તેમણે KGF 2ના શૂટિંગ દરમિયાન ગળા પર આવેલા સોજાને છુપાવવા માટે દાઢી વધારી હતી.
વર્ષ 2022માં, એક ઇન્ટરવ્યુમાં હરીશ રાયે જણાવ્યું હતું કે તેઓ ત્રણ વર્ષથી કેન્સર સામે લડી રહ્યા છે. તેમણે કહ્યું હતું કે પૈસાના અભાવે તેમની સારવારમાં વિલંબ થયો, જેના કારણે તેમની હાલત વધુ ખરાબ થઈ ગઈ. તેમણે કહ્યું હતું કે તેમણે પોતાની સર્જરી ટાળી દીધી હતી કારણ કે તેમની પાસે પૈસા નહોતા.
અભિનેતાએ અગાઉ જણાવ્યું હતું કે એક ઇન્જેક્શનનો ખર્ચ રૂ. 3.55 લાખ થતો હતો અને 63 દિવસની દરેક સાયકલમાં ત્રણ ઇન્જેક્શનની જરૂર પડતી હતી, જેનો અંદાજિત ખર્ચ રૂ. 10.5 લાખ થતો હતો. સારવારના ખર્ચને પહોંચી વળવા માટે તેમણે મિત્રો અને ઇન્ડસ્ટ્રીના લોકો પાસેથી મદદ માંગતો એક વિડિયો પણ બનાવ્યો હતો, પરંતુ તેને પોસ્ટ કરવાની હિંમત કરી શક્યા નહોતા.
હરીશ રાયે કેન્સરને કારણે ફિલ્મોમાંથી બ્રેક લીધો હતો, અને KGF સાથે વાપસી કરી હતી, પરંતુ કેન્સર ફેલાતા તેઓ ફરીથી ફિલ્મોથી દૂર થઈ ગયા હતા.
&nbsp;

સારવારના પૈસા ન હોવાથી અભિનેતાએ અંતિમ શ્વાસ લીધા,KGF 2માં દાઢીથી બીમારી છુપાવી હતી

November 6, 2025 | 22:08 IST