ગોવિંદાએ કરણ જોહરને જાહેરમાં આપી ગંભીર ચેતવણી

બોલિવૂડના દિગ્ગજ અભિનેતા ગોવિંદા સામાન્ય રીતે શાંત સ્વભાવના ગણાય છે, પરંતુ જ્યારે તેઓ મૌન તોડે છે ત્યારે સામેની વ્યક્તિની પરવા કર્યા વગર સ્પષ્ટ શબ્દોમાં પોતાની વાત રજૂ કરે છે. તાજેતરમાં જ એક મુલાકાત દરમિયાન ગોવિંદાએ જાણીતા ફિલ્મમેકર કરણ જોહર પ્રત્યે પોતાનો ભારે રોષ ઠાલવ્યો છે. આ વિવાદનું મુખ્ય કારણ વિક્કી કૌશલ અને સારા અલી ખાનની ફિલ્મ 'ગોવિંદા નામ મેરા' છે.

પોતાની અંગત જિંદગીની વાર્તા ચોરવાનો આરોપ : 

ગોવિંદાએ દાવો કર્યો છે કે કરણ જોહરના પ્રોડક્શનમાં બનેલી આ ફિલ્મની વાર્તા તેમની અસલ જિંદગીના પ્રસંગો પર આધારિત છે. તેમણે આશ્ચર્ય વ્યક્ત કરતા જણાવ્યું કે કોઈએ તેમની પરવાનગી લીધા વિના તેમના નામનો ઉપયોગ કરીને ફિલ્મ બનાવી નાખી. તેમના મતે આ ફિલ્મનો વિષય, જેમાં પતિ-પત્ની વચ્ચેની શંકા અને ગર્લફ્રેન્ડ સાથેના વિવાદો દર્શાવવામાં આવ્યા છે, તે તેમની પર્સનલ લાઈફ સાથે છેડછાડ સમાન છે.

જાહેરમાં 'પ્રસાદ' આપવાની આપી દીધી ધમકી : 

ગોવિંદાએ આ મામલે ખૂબ જ આક્રમક વલણ અપનાવતા કરણ જોહરને ચેતવણી આપી છે. તેમણે કહ્યું કે લોકો અવારનવાર બીજાની ખાનગી જિંદગીની વાર્તાઓને ફિલ્મોમાં વણી લેવાનો પ્રયાસ કરે છે. ગોવિંદાએ સ્પષ્ટ શબ્દોમાં ઉમેર્યું કે જો ભવિષ્યમાં આવી ભૂલ ફરી થઈ તો તેઓ રજનીકાંતની શૈલીમાં જાહેરમાં જવાબ આપતા ખચકાશે નહીં. તેમણે વિનંતી સાથે તાકીદ કરી છે કે મજાકને મર્યાદામાં રાખવી જોઈએ.

પત્ની સુનિતા અને અફેરની ચર્ચાઓ પર સ્પષ્ટતા : 

આ મુલાકાતમાં ગોવિંદાએ તેમની પત્ની સુનિતા આહુજાના ડેબ્યૂ અને ભૂતકાળમાં જેમના નામ સાથે તેમનું નામ જોડાયું હતું તે 'કોમલ' વિશે પણ વાત કરી હતી. તેમણે જણાવ્યું કે સુનિતાએ ઇન્ટરવ્યુમાં કોઈ આર્ટિસ્ટ કે નવા કલાકારો વિશે ખરાબ બોલવાથી બચવું જોઈએ. ઉલ્લેખનીય છે કે, અગાઉ સુનિતાએ એક ઇન્ટરવ્યુમાં કોમલ નામની યુવતી પ્રત્યે પોતાની નફરત વ્યક્ત કરી હતી, જેની સાથે ગોવિંદાના અફેરની ચર્ચા ઉઠી હતી.

ફિલ્મ 'ગોવિંદા નામ મેરા' વિશે : 

શશાંક ખેતાન દ્વારા નિર્દેશિત આ ફિલ્મ અંદાજે 55 કરોડ રૂપિયાના બજેટમાં તૈયાર થઈ હતી. આ એક કોમેડી થ્રીલર ફિલ્મ હતી જેને સીધી ઓટીટી પ્લેટફોર્મ પર રિલીઝ કરવામાં આવી હતી. નબળી વાર્તાને કારણે આ ફિલ્મને દર્શકો અને વિવેચકો તરફથી મિશ્ર પ્રતિસાદ મળ્યો હતો, જેના કારણે IMDB પર તેને માત્ર 6.5 રેટિંગ મળ્યું છે.