બોક્સ ઓફિસ પર ૧૩૦૦ કરોડથી વધુની કમાણી કરનાર ફિલ્મ 'ધુરંધર'ની સિક્વલ 'ધુરંધર: ધ રીવેન્જ' રિલીઝ પહેલા જ વિવાદોમાં સપડાઈ છે. ફિલ્મના શૂટિંગ દરમિયાન સુરક્ષા માર્ગદર્શિકાના વારંવાર ઉલ્લંઘનને પગલે બૃહન્મુંબઈ મ્યુનિસિપલ કોર્પોરેશન (BMC) એ આદિત્ય ધરના પ્રોડક્શન હાઉસ, B62 સ્ટુડિયોને બ્લેકલિસ્ટ કરવાની ભલામણ કરી છે.
સુરક્ષાના નિયમોનું ગંભીર ઉલ્લંઘન :&nbsp;
BMC ના અહેવાલ મુજબ, દક્ષિણ મુંબઈમાં ફિલ્મના શૂટિંગ દરમિયાન પ્રોડક્શન હાઉસ દ્વારા જ્વલનશીલ પદાર્થોના ઉપયોગ બાબતે બેદરકારી દાખવવામાં આવી હતી. અધિકારીઓએ નોંધ્યું હતું કે સેટ પર સલામતીના ધોરણોને નેવે મૂકીને કામ કરવામાં આવતું હતું. આ બાબતે ડેપ્યુટી મ્યુનિસિપલ કમિશનરે B62 સ્ટુડિયો સહિત અન્ય બે અરજદારોને મુંબઈમાં શૂટિંગ કરવા માટે કાયમી ધોરણે પ્રતિબંધિત કરવાનો પ્રસ્તાવ મંજૂર કર્યો છે.
મંજૂરી વગર જ્વલનશીલ પદાર્થોનો ઉપયોગ :&nbsp;
સમગ્ર વિવાદ જાન્યુઆરી અને ફેબ્રુઆરી મહિનામાં થયેલા શૂટિંગ દરમિયાન શરૂ થયો હતો. પ્રોડક્શન હાઉસને ફટાકડા કે કોઈ પણ જોખમી પદાર્થ વગર શૂટિંગ કરવાની શરતે પરવાનગી અપાઈ હતી. જોકે, ચેતવણી આપ્યા હોવા છતાં ૧૪ ફેબ્રુઆરીના રોજ રાત્રિના શૂટિંગ દરમિયાન સળગતી મશાલોનો ઉપયોગ કરવામાં આવ્યો હતો. સ્થાનિક ફરિયાદના આધારે પોલીસે ઘટનાસ્થળે પહોંચી પાંચ સળગતી મશાલો જપ્ત કરી હતી.
રિલીઝ પર સંકટ ?
૧૯ માર્ચે રિલીઝ થનારી આ ફિલ્મ માટે આ કાયદાકીય કાર્યવાહી મોટો ફટકો સાબિત થઈ શકે છે. જો આ બ્લેકલિસ્ટિંગનો પ્રસ્તાવ સત્તાવાર રીતે લાગુ થશે, તો આદિત્ય ધર અને તેમનું પ્રોડક્શન હાઉસ ભવિષ્યમાં મહારાષ્ટ્રના સત્તાવાર પોર્ટલ દ્વારા શૂટિંગની મંજૂરી મેળવી શકશે નહીં. વારંવારના ઉલ્લંઘનને કારણે તંત્રએ તેમની ડિપોઝિટ પણ જપ્ત કરી લીધી છે.

સલામતી નિયમોના ઉલ્લંઘનથી પ્રોડક્શન હાઉસને બ્લેકલિસ્ટ કરવાની ભલામણ

February 17, 2026 | 15:30 IST