ભારતીય સિનેમા અને રાજકારણમાં ફરી એકવાર 'ધ કેરળ સ્ટોરી 2: ગોઝ બિયોન્ડ' ને લઈને ઘર્ષણ શરૂ થયું છે. ફિલ્મ 27 ફેબ્રુઆરી, 2026 ના રોજ મોટા પડદા પર આવવાની છે, પરંતુ તે પહેલાં જ કોંગ્રેસના સાંસદ શશી થરૂરે આ ફિલ્મને નફરત ફેલાવનારી અને વાસ્તવિકતાથી દૂર ગણાવી છે.
શશી થરૂરના ગંભીર આક્ષેપો :&nbsp;
નવી દિલ્હીમાં મીડિયા સાથે વાતચીત કરતા શશી થરૂરે જણાવ્યું કે અગાઉની ફિલ્મની જેમ આ સિક્વલમાં પણ પુરાવા વગરની વાર્તાઓને પ્રોત્સાહન આપવામાં આવી રહ્યું છે. તેમણે દાવો કર્યો કે ફિલ્મમાં બતાવવામાં આવેલા ધર્માંતરણના આંકડા અતિશયોક્તિભર્યા છે. થરૂરના મતે, વર્ષોમાં માત્ર ગણતરીના કેસો નોંધાયા હોવા છતાં તેને હજારોની સંખ્યામાં દર્શાવવા તે ખોટું છે. તેમણે ભૂતકાળની 'અમર અકબર એન્થોની' જેવી ફિલ્મોનું ઉદાહરણ આપીને સાંપ્રદાયિક સૌહાર્દ જાળવવાની જરૂરિયાત પર ભાર મૂક્યો હતો.
ફિલ્મની વાર્તા અને નિર્માતાઓનો પક્ષ :&nbsp;
'ધ કેરળ સ્ટોરી 2' નું ટ્રેલર તાજેતરમાં રિલીઝ થયું છે, જેમાં રાજસ્થાન, મધ્યપ્રદેશ અને કેરળના ધાર્મિક પરિવર્તન અને કટ્ટરવાદના વિષયોને વણી લેવામાં આવ્યા છે. નિર્માતાઓનું કહેવું છે કે આ ફિલ્મ સમાજના કઠોર સત્ય અને ઉગ્રવાદના જોખમને ઉજાગર કરે છે. નિર્માતાઓએ સોશિયલ મીડિયા પર આક્રમક રીતે ફિલ્મને પ્રમોટ કરી છે.
કાનૂની ગૂંચ અને રાજકીય વિરોધ :&nbsp;
ફિલ્મ સામે હવે કાનૂની મોરચે પણ આફત આવી છે. હાઈકોર્ટમાં ફિલ્મના ટ્રેલર અને તેના પ્રતિકાત્મક ચિત્રણ સામે અરજી દાખલ કરવામાં આવી છે, જેના પગલે સેન્સર બોર્ડ અને માહિતી-પ્રસારણ મંત્રાલયને નોટિસ પાઠવવામાં આવી છે. આ કેસની આગામી સુનાવણી 24 ફેબ્રુઆરીએ હાથ ધરાશે. બીજી તરફ, કેરળના મુખ્યમંત્રી પિનરાયી વિજયને પણ આ ફિલ્મને રાજ્યની છબી ખરડવાનો પ્રયાસ ગણાવીને તેની સખત નિંદા કરી છે.&nbsp;

27 ફેબ્રુઆરીએ રિલીઝ થનારી ફિલ્મ સિક્વલ સામે હાઈકોર્ટમાં અરજી, શશી થરૂરે ગણાવી વિભાજનકારી

February 20, 2026 | 17:12 IST