કોકટેલ 2: શાહિદ-રશ્મિકા-કૃતિનો નવો પ્રેમત્રિકોણ

દીપિકા પાદુકોણ અને સૈફ અલી ખાનની યાદગાર ફિલ્મ 'કોકટેલ' બાદ હવે તેના બીજા ભાગને લઈને ચાહકોમાં જબરદસ્ત ઉત્સાહ જોવા મળી રહ્યો છે. હોમી અડાજાનિયાના નિર્દેશનમાં બનેલી આ સિક્વલમાં શાહિદ કપૂર મુખ્ય ભૂમિકામાં છે, જ્યારે તેની સાથે કૃતિ સેનન અને રશ્મિકા મંદન્ના પણ મહત્વના રોલમાં જોવા મળશે.

શું હશે ફિલ્મની વાર્તા ?

સૂત્રોના જણાવ્યા અનુસાર, 'કોકટેલ 2' આધુનિક સંબંધો પર આધારિત એક શક્તિશાળી પ્રેમ ત્રિકોણ રજૂ કરશે. એવા અહેવાલો પણ વહેતા થયા છે કે આ ફિલ્મમાં કૃતિ સેનન અને રશ્મિકા મંદન્નાના પાત્રો વચ્ચે અનોખો સંબંધ બતાવવામાં આવી શકે છે, જેમાં શાહિદ કપૂર ત્રીજા પાત્ર તરીકે વાર્તામાં વળાંક લાવશે. જોકે, નિર્માતાઓ તરફથી વાર્તા અંગે હજુ સુધી કોઈ સત્તાવાર પુષ્ટિ કરવામાં આવી નથી.

શૂટિંગ પૂર્ણ અને સેલિબ્રેશન :

ફિલ્મનું શૂટિંગ ૩૧ જાન્યુઆરીના રોજ પૂર્ણ થઈ ગયું છે. દિગ્દર્શક હોમી અડાજાનિયાએ સોશિયલ મીડિયા પર સેટ પરથી તસવીરો શેર કરી હતી, જેમાં સમગ્ર ટીમ કેક કાપીને શૂટિંગ પૂર્ણ થયાની ઉજવણી કરતી જોવા મળી હતી. હોમીએ પોતાની ટીમને 'ફેબ્રુલસ' ગણાવીને આ ફિલ્મને પોતાના માટે ખૂબ જ ખાસ ગણાવી છે.

ક્યારે રિલીઝ થશે 'કોકટેલ 2' ?

રિપોર્ટ્સ મુજબ, 'કોકટેલ 2' સપ્ટેમ્બર ૨૦૨૬ માં સિનેમાઘરોમાં રિલીઝ થઈ શકે છે. શાહિદ કપૂરની અગાઉની રિલીઝ 'ઓ'રોમિયો' અને આ ફિલ્મ વચ્ચે છ મહિનાનો સમયગાળો રાખવામાં આવ્યો છે, જેથી બંને ફિલ્મોને બોક્સ ઓફિસ પર પૂરતો અવકાશ મળી રહે.

જૂની 'કોકટેલ' ની સફળતા :

જુલાઈ ૨૦૧૨માં રિલીઝ થયેલી પહેલી ફિલ્મે વિશ્વભરમાં ₹૧૨૬ કરોડની કમાણી કરી હતી. ઇમ્તિયાઝ અલીના લેખન અને પ્રીતમના સંગીતે તે સમયે ભારે ધૂમ મચાવી હતી. હવે જોવાનું એ રહેશે કે લવ રંજન દ્વારા લખાયેલી આ નવી વાર્તા પ્રેક્ષકોના દિલ જીતવામાં કેટલી સફળ રહે છે.