પંજાબી ગાયક અને અભિનેતા અમર સિંહ ચમકીલાના જીવન પર બનેલી ફિલ્મ 'અમર સિંહ ચમકીલા'ને પ્રતિષ્ઠિત ઇન્ટરનેશનલ એમી એવોર્ડ્સમાં બે નોમિનેશન મળતા ભારતીય સિનેમામાં ખુશીની લહેર ફેલાઈ છે. આ ફિલ્મ 'ટીવી મૂવી/મિનિ-સીરીઝ' શ્રેણીમાં નોમિનેટ થઈ છે, જ્યારે તેના મુખ્ય અભિનેતા દિલજીત દોસાંઝને 'બેસ્ટ પરફોર્મન્સ બાય એન એક્ટર' શ્રેણીમાં નોમિનેશન મળ્યું છે. આ એકમાત્ર ભારતીય એન્ટ્રી છે જેને એમી એવોર્ડ્સમાં સ્થાન મળ્યું છે.
ઇમ્તિયાઝ અલી અને દિલજીતનો આનંદ
ફિલ્મના નિર્દેશક ઇમ્તિયાઝ અલીએ આ સફળતાને પંજાબ અને તેના કલાકારોની ઓળખ ગણાવી છે. તેમણે એક નિવેદનમાં કહ્યું, "ચમકીલાની વાર્તા પંજાબની સંસ્કૃતિ, સંગીત અને સંઘર્ષને દર્શાવે છે. અમે ખૂબ ખુશ છીએ કે અમે આ અનોખી વાર્તાને દુનિયા સમક્ષ રજૂ કરી શક્યા." ઇમ્તિયાઝ અલીએ દિલજીત દોસાંઝના અભિનયની પણ પ્રશંસા કરી, અને કહ્યું કે તેના વગર આ ફિલ્મ બની જ ન શકત.
બીજી તરફ, દિલજીત દોસાંઝે આ નોમિનેશનને દિવંગત ગાયક અમર સિંહ ચમકીલાની વારસાને શ્રદ્ધાંજલિ ગણાવી છે.&nbsp; અભિનેતાએ કહ્યું, "હું ખરેખર ગૌરવ અનુભવું છું કે પંજાબના એક કલાકારને ઇન્ટરનેશનલ એમી જેવા પ્રતિષ્ઠિત પ્લેટફોર્મ પર માન્યતા મળી રહી છે. હું આ ભૂમિકા માટે મને પસંદ કરવા બદલ ઇમ્તિયાઝ અલી સરનો આભારી છું."
દિલજીત દોસાંઝ 'બેસ્ટ એક્ટર'ની શ્રેણીમાં યુનાઇટેડ કિંગડમ, સ્પેન અને કોલંબિયાના અભિનેતાઓ સાથે સ્પર્ધા કરશે. 'અમર સિંહ ચમકીલા' 24 નવેમ્બરના રોજ ન્યૂ યોર્ક સિટીમાં યોજાનાર 53મા ઇન્ટરનેશનલ એમી એવોર્ડ્સમાં જર્મની, યુનાઇટેડ કિંગડમ અને ચિલીની ફિલ્મો સાથે સ્પર્ધા કરશે.
નેટફ્લિક્સ ઇન્ડિયાના કન્ટેન્ટ વાઇસ પ્રેસિડેન્ટ મોનિકા શેરગિલે પણ આ નોમિનેશન પર ખુશી વ્યક્ત કરી અને આ ફિલ્મને ભારતીય વાર્તાઓનું વૈશ્વિક સ્તરે પહોંચવાનું એક ઉદાહરણ ગણાવ્યું. આ પહેલા, 'દિલ્હી ક્રાઈમ' (2020) અને કોમેડિયન વિર દાસ (2021) એ પણ એમી એવોર્ડ્સ જીતીને ભારતનું ગૌરવ વધાર્યું છે.
&nbsp;
&nbsp;
&nbsp;
&nbsp;
&nbsp;
&nbsp;

એમીમાં ‘અમર સિંહ ચમકીલા નોમિનેટ

એમીમાં ભારતની એકમાત્ર એન્ટ્રી તરીકે ‘અમર સિંહ ચમકીલા’, દિલજીત દોસાંઝ બેસ્ટ એક્ટરની રેસમાં.

September 26, 2025 | 19:22 IST