રોહિત શેટ્ટી ઘર ફાયરિંગ કેસમાં મોટો ખુલાસો

મુંબઈ પોલીસે ફિલ્મ ડિરેક્ટર રોહિત શેટ્ટીના ઘર બહાર થયેલા ફાયરિંગ અને અભિનેતા રણવીર સિંહને મળેલી ધમકીના કેસમાં તપાસ તેજ કરી છે. ક્રાઈમ બ્રાન્ચે આ મામલે પકડાયેલા ચાર આરોપીઓ સાથે ઘટનાસ્થળનું રિક્રિએશન કર્યું છે. તપાસ દરમિયાન પોલીસ આરોપીઓને પુણેથી મુંબઈ સુધીના તે તમામ માર્ગો પર લઈ ગઈ હતી જેનો ઉપયોગ ગુનાને અંજામ આપવા માટે કરવામાં આવ્યો હતો.

તપાસમાં નાણાકીય લેવડદેવડની વિગતો આવી સામે : 

પોલીસ તપાસમાં જાણવા મળ્યું છે કે આ હુમલા માટે મુખ્ય આરોપી શુભમ લોનકરે શૂટર્સને કુલ 51,000 રૂપિયા આપ્યા હતા. આ રકમમાંથી 30,000 રૂપિયાનો ઉપયોગ ગુનામાં વપરાયેલું સ્કૂટર ખરીદવા માટે કરવામાં આવ્યો હતો, જ્યારે બાકીના પૈસા આરોપીઓએ પોતાના ખર્ચ માટે વાપર્યા હતા. પોલીસ હજુ પણ ફરાર શૂટર અને તેના સાથીની શોધખોળ કરી રહી છે.

રોહિત અને રણવીરને મળેલી ધમકીઓ : 

નોંધનીય છે કે 31 જાન્યુઆરીની રાત્રે રોહિત શેટ્ટીના જુહુ સ્થિત નિવાસસ્થાને પાંચ રાઉન્ડ ફાયરિંગ કરવામાં આવ્યું હતું. ત્યારબાદ લોરેન્સ ગેંગના સભ્ય હોવાનો દાવો કરતા હેરી બોક્સર નામના શખ્સે ઓડિયો ક્લિપ દ્વારા રણવીર સિંહ અને રોહિત શેટ્ટીને જાનથી મારી નાખવાની ધમકી આપી હતી. આ ઓડિયો ક્લિપમાં મેનેજરો અને તેમના પરિવારને નિશાન બનાવવાની વાત પણ કરવામાં આવી હતી.

AI ટૂલ્સના ઉપયોગની આશંકા : 

મુંબઈ પોલીસ હાલમાં એ વાતની પણ ગંભીરતાથી તપાસ કરી રહી છે કે સોશિયલ મીડિયા પર વાયરલ થયેલી આ ધમકીભરી ઓડિયો ક્લિપ અસલી છે કે પછી આર્ટિફિશિયલ ઇન્ટેલિજન્સ (AI) નો ઉપયોગ કરીને બનાવવામાં આવી છે. પોલીસે બંનેના મેનેજરોના નિવેદનો નોંધીને સુરક્ષા વ્યવસ્થા સખત કરી દીધી છે.