બોલિવૂડના દિગ્ગજ ગાયક અરિજિત સિંહે હાલમાં જ પ્લેબેક સિંગિંગમાંથી નિવૃત્તિ લેવાની જાહેરાત કરીને ચાહકોને ચોંકાવી દીધા હતા. આ જાહેરાત બાદ રવિવારે કોલકાતાના નેતાજી ઇન્ડોર સ્ટેડિયમમાં અરિજિત પ્રથમ વખત જાહેર મંચ પર જોવા મળ્યો હતો. વિશ્વ વિખ્યાત સિતારવાદક અનુષ્કા શંકર સાથેના આ લાઈવ કોન્સર્ટમાં અરિજિતનો એક અલગ જ અંદાજ જોવા મળ્યો હતો.
સ્ટેજ પર ભાવુક થયો અરિજિત :&nbsp;
કોન્સર્ટ દરમિયાન અરિજિત સિંહ અને અનુષ્કા શંકરે પંડિત રવિ શંકર દ્વારા કમ્પોઝ કરવામાં આવેલું બંગાળી ક્લાસિક ગીત રજૂ કર્યું હતું. જ્યારે અનુષ્કાએ અરિજિતને પ્રેક્ષકો સમક્ષ રજૂ કર્યો ત્યારે તે ભાવુક થઈ ગયો હતો. તેણે પોતાની નર્વસનેસ સ્વીકારતા આ તક આપવા બદલ આભાર માન્યો હતો. આ કાર્યક્રમમાં પ્રખ્યાત પર્કશનિસ્ટ બિક્રમ ઘોષ પણ હાજર રહ્યા હતા. નોંધનીય છે કે 27 જાન્યુઆરીએ અરિજિતે સોશિયલ મીડિયા પર જાહેરાત કરી હતી કે તે હવે નવા પ્લેબેક સિંગિંગ પ્રોજેક્ટ્સ સ્વીકારશે નહીં.
ફેમ ગુરુકુલથી પદ્મશ્રી સુધીની સફર :&nbsp;
1987માં પશ્ચિમ બંગાળમાં જન્મેલા અરિજિત સિંહને સંગીત વારસામાં મળ્યું છે. 2005માં સિંગિંગ રિયાલિટી શો ફેમ ગુરુકુલથી પોતાની સફર શરૂ કરનાર અરિજિતે સંઘર્ષના દિવસોમાં બેકગ્રાઉન્ડ સિંગર તરીકે પણ કામ કર્યું હતું. તેને ફિલ્મ મર્ડર 2 ના ગીત ફિર મોહબ્બતથી મોટી ઓળખ મળી અને ત્યારપછી તેણે ક્યારેય પાછું વળીને જોયું નથી. રાબતા અને તુમ હી હો જેવા ગીતોએ તેને રાતોરાત સુપરસ્ટાર બનાવી દીધો હતો.
એવોર્ડ્સ અને સિદ્ધિઓનો પહાડ :&nbsp;
પોતાની કારકિર્દીમાં અરિજિતે હિન્દી, બંગાળી અને તેલુગુ સહિતની ભાષાઓમાં 700થી વધુ ગીતો ગાયા છે. તેની પ્રતિભા માટે તેને 2 નેશનલ એવોર્ડ અને 8 ફિલ્મફેર સહિત કુલ 122 એવોર્ડ મળ્યા છે. વર્ષ 2015માં ભારત સરકાર દ્વારા તેને પદ્મશ્રીથી સન્માનિત કરવામાં આવ્યો હતો. પદ્માવતનું બિનતે દિલ અને બ્રહ્માસ્ત્રનું કેસરિયા તેના એવા ગીતો છે જેના માટે તેને રાષ્ટ્રીય સન્માન મળ્યું છે.

અરિજિત સિંહ લાઈવ કોન્સર્ટ

કોલકાતામાં અનુષ્કા શંકર સાથે મંચ ગજવતા ભાવુક થયો અરિજિત સિંહ

February 9, 2026 | 16:58 IST