ફિલ્મ નિર્દેશક રોહિત શેટ્ટીના નિવાસસ્થાને થયેલા ફાયરિંગ મામલે તપાસ એજન્સીઓને મોટી સફળતા મળી છે. મુંબઈ ક્રાઈમ બ્રાન્ચ અને હરિયાણા સ્પેશિયલ ટાસ્ક ફોર્સે એક સંયુક્ત ઓપરેશન હાથ ધરીને હરિયાણાના બહાદુરગઢથી ચાર શખ્સોની ધરપકડ કરી છે. પકડાયેલા આરોપીઓમાં મુખ્ય શૂટર દીપકનો પણ સમાવેશ થાય છે, જે વિદેશમાં બેઠેલા ગેંગસ્ટરોના સંપર્કમાં હતો.
બિશ્નોઈ ગેંગ સાથેનું કનેક્શન :&nbsp;
પોલીસ તપાસમાં બહાર આવ્યું છે કે મુખ્ય આરોપી દીપક સોશિયલ મીડિયા દ્વારા લોરેન્સ બિશ્નોઈ ગેંગના સાગરીતો હરિ બોક્સર અને આરજુ બિશ્નોઈ સાથે જોડાયેલો હતો. આ હુમલાનું કાવતરું વિદેશમાં ઘડવામાં આવ્યું હતું. આરજુ બિશ્નોઈએ આ કામ માટે બાબા સિદ્દીકી કેસના વોન્ટેડ આરોપી શુભમ લોંકર સાથે પણ ચર્ચા કરી હતી. પ્રાથમિક વિગતો મુજબ, શૂટર દીપકને આ હુમલો કરવા માટે એડવાન્સ પેમેન્ટ તરીકે ₹50,000 આપવામાં આવ્યા હતા.
ઓપરેશન અને ધરપકડની વિગત :&nbsp;
આ કેસમાં અત્યાર સુધીમાં કુલ 11 લોકોની ધરપકડ કરવામાં આવી છે. બહાદુરગઢથી પકડાયેલા ચારેય આરોપીઓ મૂળ ઉત્તર પ્રદેશના રહેવાસી છે.
દીપક: મુખ્ય શૂટર જેણે ગોળીબાર કર્યો હતો
સની અને સોનુ: રોહિત શેટ્ટીના ઘરની રેકી કરી હતી
ઋત્વિક: શૂટરોને આશરો આપી છુપાવવામાં મદદ કરી હતી
અગાઉ પુણે અને ઉત્તર પ્રદેશમાંથી પણ સાત આરોપીઓને ઝડપી લેવામાં આવ્યા હતા. આ તમામ આરોપીઓને હવે વધુ પૂછપરછ માટે મુંબઈ પોલીસના ખંડણી વિરોધી સેલને સોંપવામાં આવ્યા છે.
ઘટનાક્રમ :&nbsp;
રોહિત શેટ્ટીના ઘરે 1 ફેબ્રુઆરીની મોડી રાત્રે ફાયરિંગની ઘટના બની હતી, જેની જવાબદારી હરિ બોક્સરે સ્વીકારી હતી. આ ઘટના બાદ મુંબઈ પોલીસે તરત જ એક્શનમાં આવી નિર્દેશકની સુરક્ષા વધારી દીધી હતી અને માત્ર 15 દિવસમાં જ તમામ મુખ્ય કાવતરાખોરોને જેલના સળિયા પાછળ ધકેલી દીધા છે. હુમલામાં અત્યાધુનિક હથિયારોનો ઉપયોગ થયો હોવાની પણ આશંકા છે.

બિશ્નોઈ ગેંગના ઈશારે થયું હતું ફાયરિંગ, હરિયાણા અને મુંબઈ પોલીસનું સંયુક્ત ઓપરેશન સફળ

February 16, 2026 | 16:44 IST