પ્રશાંત કિશોર શરત હાર્યા, ભવિષ્યવાણી ખોટી પડી!

બિહાર વિધાનસભા ચૂંટણીમાં ફરીથી NDAની સરકાર બની રહી છે. ચૂંટણીના પરિણામોએ ત્રીજા મોરચા તરીકે ઊભરી આવવા માંગતા જન સુરાજ પાર્ટીના સ્થાપક અને રણનીતિ કાર પ્રશાંત કિશોરને મોટો ઝટકો આપ્યો છે. તેની પાર્ટીનું પ્રદર્શન નિરાશાજનક રહ્યુ છે. જ્યારે તેમણે JDUની બેઠકો વિશે કરેલી ભવિષ્યવાણી સંપૂર્ણપણે ખોટી સાબિત થઈ છે.

બિહાર વિધાનસભા ચૂંટણીના વલણોથી NDAનો વિજય સ્પષ્ટ થઈ ગયો છે. મુખ્યમંત્રી નીતિશ કુમાર ફરીવાર પદ સંભાળવાની તૈયારીમાં છે. JDU અને BJP વચ્ચે સૌથી મોટા પક્ષની રેસ ચાલી રહી છે. ક્યારેક JDU તો ક્યારેક BJP નજીવી લીડ સાથે આગળ જઈ રહી છે. ત્યારે પ્રશાંત કિશોરે ચૂંટણી પ્રચાર દરમિયાન ઘણી વખત દાવો કર્યો હતો કે આ વખતે JDU 25થી વધુ બેઠકો નહીં જીતે. ચૂંટણીના વલણો સ્પષ્ટ સંકેત આપે છે કે JDU 70 બેઠકોના આંકડાને વટાવી ચૂક્યું છે અને તે પ્રશાંત કિશોરની કલ્પના કરતાં ત્રણ ગણી વધુ બેઠકો જીતવા તરફ આગળ વધી રહ્યું છે.

બિહાર વિધાનસભા ચૂંટણીના પરિણામો બાદ સૌથી મોટો સવાલ પ્રશાંત કિશોરના વચન પર થઈ રહ્યો છે. પ્રશાંત કિશોરે અનેક ઇન્ટરવ્યુમાં સ્પષ્ટપણે કહ્યું હતું કે, 'જો JDU 25થી વધુ બેઠકો જીતશે, તો તેઓ રાજકારણ છોડી દેશે.' હવે એ જોવાનું રસપ્રદ રહેશે કે પ્રશાંત કિશોર શરત હાર્યા પછી રાજકારણમાંથી નિવૃત્તિ લે છે કે પછી કોઈ બહાનું કાઢીને પોતાના વચનથી પાછા હટી જાય છે. રાજકીય વ્યૂહ રચનાકાર તરીકે સફળ કારકિર્દી બાદ રાજકારણમાં પ્રવેશનાર પ્રશાંત કિશોર માટે બિહારની ચૂંટણીના પરિણામો મોટો વ્યક્તિગત પડકાર લઈને આવ્યા છે.

પ્રશાંત કિશોરે દાવો કર્યો હતો કે, બિહાર વિધાનસભા ચૂંટણીમાં JDUને 25થી વધુ બેઠકો નહીં મળે. તેમણે શરત લગાવતા કહ્યું છે કે જો JDU 25થી વધુ બેઠકો જીતી જશે, તો તેઓ રાજકારણ છોડી દેશે. તેમણે પશ્ચિમ બંગાળની ચૂંટણી વખતે ભાજપ માટે કરેલી ભવિષ્યવાણીને યાદ અપાવી હતી, જે સાચી પડી હતી.

પ્રશાંત કિશોરે એવો દાવો કર્યો હતો કે બિહાર ચૂંટણીના પરિણામો (નવેમ્બર 2025) પછી નીતીશ કુમાર બિહારના મુખ્યમંત્રી પદે નહીં રહે. તેમણે કહ્યું છે કે આ વાત લખીને લઈ લો અને જો આ ભવિષ્યવાણી ખોટી પડે તો તેઓ રાજકારણમાંથી સંન્યાસ લઈ લેશે.