બિહારમાં SIR મુદ્દે ચૂંટણીપંચે સોગંદનામુ રજૂ કર્યુ

બિહારમાં ચાલી રહેલા સ્પેશિયલ ઇન્ટેન્સિવ રિવિઝન (SIR) પરના વિવાદ વચ્ચે ચૂંટણી પંચે સુપ્રીમ કોર્ટમાં એક સોગંદનામું દાખલ કર્યું છે. જેમાં સ્પષ્ટતા કરવામાં આવી છે કે રાજ્યમાં કોઈપણ પાત્ર મતદારનું નામ પૂર્વ સૂચના સુનાવણીની તક અને સક્ષમ અધિકારીના તર્કસંગત આદેશ વિના મતદાર યાદીમાંથી દૂર કરવામાં આવશે નહીં. ચૂંટણી પંચે કહ્યું કે અંતિમ મતદાર યાદીમાં દરેક પાત્ર મતદારનું નામ સામેલ કરવા માટે તમામ શક્ય પગલાં લેવામાં આવી રહ્યા છે અને આ દિશામાં કડક સૂચનાઓ જારી કરવામાં આવી છે.

આ મામલો ત્યારે ચર્ચામાં આવ્યો જ્યારે એસોસિએશન ફોર ડેમોક્રેટિક રિફોર્મ્સ (ADR) એ આરોપ લગાવ્યો કે બિહારમાં SIR દરમિયાન 65 લાખ મતદારોને ખોટી રીતે યાદીમાંથી બાકાત રાખવામાં આવ્યા છે. 6 ઓગસ્ટના રોજ સુપ્રીમ કોર્ટે આ અંગે સુનાવણી કરતી વખતે ચૂંટણી પંચને સોગંદનામું દાખલ કરવા નિર્દેશ આપ્યો હતો. હવે આ મામલાની સુનાવણી 12 ઓગસ્ટે કરવામાં આવશે.

ચૂંટણી પંચે પોતાના વધારાના સોગંદનામામાં જણાવ્યું છે કે, SIRનો પ્રથમ તબક્કો પૂર્ણ થઈ ગયો છે અને 1 ઓગસ્ટ, 2025 ના રોજ ડ્રાફ્ટ મતદાર યાદી પ્રકાશિત કરવામાં આવી છે. બૂથ લેવલ ઓફિસરો (BLOs) દ્વારા ઘરે ઘરે જઈને મતદારોના નામ અને જરૂરી ફોર્મ એકત્રિત કર્યા પછી આ તબક્કો પૂર્ણ થયો હતો. બિહારમાં કુલ 7.89 કરોડ મતદારોમાંથી 7.24 કરોડ લોકોએ તેમના નામની પુષ્ટિ કરી હતી અથવા ફોર્મ સબમિટ કર્યા હતા. બિહારના મુખ્ય ચૂંટણી અધિકારી, 38 જિલ્લા ચૂંટણી અધિકારીઓ, 243 ચૂંટણી નોંધણી અધિકારીઓ, 77,895 BLO, 2.45 લાખ સ્વયંસેવકો અને 1.60 લાખ બૂથ લેવલ એજન્ટો વ્યાપક અભિયાનમાં જોડાયા હતા.

ચૂંટણી પંચે વધુમાં જણાવ્યું હતું કે રાજકીય પક્ષોને સમયાંતરે નામો ઉમેરી શકાય તે માટે છોડી દેવાયેલા મતદારોની યાદી ઉપલબ્ધ કરાવવામાં આવી હતી. સ્થળાંતરિત મજૂરો માટે 246 અખબારોમાં હિન્દીમાં જાહેરાતો જારી કરવામાં આવી હતી અને ફોર્મ ભરવાની સુવિધા ઓનલાઈન અને ઓફલાઈન બંને માધ્યમો દ્વારા આપવામાં આવી હતી. શહેરી સંસ્થાઓમાં ખાસ શિબિરોનું આયોજન કરવામાં આવ્યું હતું. યુવાનોની નોંધણી માટે અગાઉથી અરજીની વ્યવસ્થા કરવામાં આવી હતી. જ્યારે વરિષ્ઠ નાગરિકો, દિવ્યાંગો અને નબળા વર્ગોને મદદ કરવા માટે 2.5 લાખ સ્વયંસેવકોને તૈનાત કરવામાં આવ્યા હતા.

ચૂંટણી પંચે ખાસ સ્પષ્ટતા કરી છે કે ડ્રાફ્ટ યાદીમાંથી કોઈપણ નામ દૂર કરતા પહેલા, નોટિસ જારી કરવી, સંબંધિત વ્યક્તિને સુનાવણીની તક આપવી અને સક્ષમ અધિકારીનો તર્કસંગત આદેશ જરૂરી રહેશે. ડ્રાફ્ટ યાદી પર દાવા અને વાંધા દાખલ કરવાનો સમયગાળો 1 ઓગસ્ટથી 1 સપ્ટેમ્બર, 2025 સુધી નક્કી કરવામાં આવ્યો છે. જેના માટે ઓનલાઈન અને પ્રિન્ટ બંને ફોર્મેટ ઉપલબ્ધ કરાવવામાં આવ્યા છે. ચૂંટણી પંચે વધુમાં જણાવ્યું હતું કે પ્રક્રિયાની પારદર્શિતા અને જનજાગૃતિ માટે દરરોજ પ્રેસ રિલીઝ જારી કરવામાં આવી રહી છે. જેથી કોઈપણ પાત્ર મતદારનું નામ અંતિમ મતદાર યાદીમાંથી બાકાત ન રહે.

--IANS