ખેડૂતોની તબાહી પર રાજકીય તમાશા

ભારતના રાજકારણીઓને જો ઓલમ્પિક્સની ગોળાફેંક સ્પર્ધામાં મોકલવામાં આવે, તો દેશને ગોલ્ડ, સિલ્વર અને બ્રોન્ઝ ત્રણેય મેડલ મળશે. કારણ કે આ નેતાઓની વચનબાજી અને ખાલી ફેંકમાં કોઈ ટક્કર નથી. તેમને ખબર છે કે દેશની પ્રજાની યાદશક્તિ નબળી છે.
બે વર્ષ પછી કોઈને યાદ રહેશે કે આપના નેતા ઇસુદાન ગઢવીએ ખેડૂતોને શું વચન આપ્યું હતું?

ખેડૂતો માટે બોલવું સહેલું છે, પરંતુ ખેડૂતોની હકીકત સમજવી મુશ્કેલ છે. ગુજરાતના ખેડૂતો માવઠાથી તબાહ થઈ ગયા છે, ખેતરોમાં નુકસાન છે, અને આર્થિક કટોકટી છે. એવા સમયે રાજકીય પક્ષો ખેડૂતોના દુઃખનો રાજકારણ માટે ઉપયોગ કરે છે.

ઇસુદાન ગઢવી, તમારું વચન હતું કે આપની સરકાર ખેડૂતોને ઉદ્યોગપતિ બનાવશે, પરંતુ આજની ઘડીમાં તેમને આર્થિક સહાયની જરૂર છે, સપના નહીં. તમે ખેડૂતોને “બે વર્ષ રાહ જો” કહેતા હો, પણ ખેડૂતોનું હાલત તો ક્રિટિકલ પેશન્ટ જેવી છે, જેને હવે આર્થિક ઓક્સિજન જોઈએ.

તમારે ન ભૂલવું જોઈએ કે તમે જ નરેન્દ્ર મોદીના વચનો પર ટિપ્પણી કરતા હતા—“2022 સુધી ખેડૂતોની આવક બમણી થશે”—અને તે વચન ખોટું નીકળ્યું. હવે તમે એ જ માર્ગે ચાલો છો?

ગુજરાતમાં પાક વિમા યોજના અમલમાં નથી, જ્યારે કેરલ, ગોવા જેવા રાજ્યો પોતાની યોજનાઓ ચલાવે છે. Restructured Weather Based Crop Insurance Scheme જેવી યોજના પણ ઘણા રાજ્યોને લાભ આપે છે, પરંતુ ગુજરાતના ખેડૂત સુધી તે પહોંચતી નથી. તમારો પક્ષ શું કરી રહ્યો છે તેની અસરકારક અમલ માટે?

SDRF (State Disaster Response Fund)ના વળતરના દર ત્રણ વર્ષથી એ જ છે. જ્યારે બિયારણ, ખાતર, ટ્રેક્ટર, મજૂરીના દર બધું વધ્યું છે. શું ખેડૂતો મોંઘવારીમાંથી મુક્ત છે?

ઇસુદાન ગઢવી, તમે કિસાન મહાપંચાયત કરો છો, એ સારું છે, પરંતુ વચન આપો તો પાળો. જો નહીં પાળી શકો, તો ખેડૂતોના દાઝેલા મન પર ખોટી આશાનું ડામ ન લગાવો.
ખેડૂત પરિવારમાંથી આવો છો—તો ખેડૂતની વેદના અનુભવો, રાજકારણની ફેંકબાજી નહીં કરો.