નેતાઓની ચપ્પલ રમત, પ્રજાની સમસ્યા ગુમ

ગુજરાતની રાજકીય જમીન પર ચપ્પલ–જૂતા ફેંકવાની ઘટના જાણે નવી પરંપરા બની ગઇ હોય તેમ લાગી રહ્યું છે. ગોપાલ ઇટાલિયા પર ચપ્પલ ફેંકાઈ અને ક્ષણોમાં સોશિયલ મીડિયા પર લાખો વ્યૂ સાથે મનોરંજનનો વિષય બની ગયું. પરંતુ નાગરિક તરીકે વિચારીએ તો આ “મનોરંજન” નહીં, પરંતુ આપણા જાહેર જીવનને ભરડામાં લેતી એક ખતરનાક રાજકીય માનસિક બિમારી છે. વધુ ચિંતા તો એ છે કે કેટલાક લોકો આ ચપ્પલ–ઝપાઝપી ને બદલો, સમાજ અને સમુદાયના નામે નેતા બનીને રજૂ કરે છે.

ગોપાલ ઇટાલિયા કહે છે કે તેઓ ચપ્પલ ફેંકનાર સામે ફરિયાદ નહીં કરે. માણસને પોતે વિષે બડાઈ મારવી હોય તો આવી જ વાતો કરે. પરંતુ યાદ રાખવું જોઇએ કે ગુજરાતમાં ચપ્પલ ફેંકવાની શરૂઆત ૨૦૧૭માં તે જ ગોપાલ ઇટાલિયાએ કરી હતી. આજે તેના પ્રતિભારૂપે ચપ્પલ ફેંકાયું તો નવાઈ શું? તમે જેવું વાવો, તેવું જ લણશો — રાજકારણની આ અવિનાશી લાઇન ફરી-સાબિત થઈ છે.

પરંતુ મુદ્દો એટલો નથી કે ચપ્પલ ફેંકાયું; મુદ્દો છે કે છત્રપાલસિંહે પોતાનો બદલો સમાજના નામે ન્યાયસંગત બતાવવાનો પ્રયાસ કર્યો. રાજપૂત સમાજનું નામ ખેંચીને પોતાનું રાજકીય સ્ટંટ ન્યાયસંગત દર્શાવવું, એ સમાજ વિરોધી અને ખતરનાક હરકત છે. જે લોકો ખરા અર્થમાં સમાજ માટે કામ કરે છે, તેઓ સમાજના નામે ચરી ખાતા નથી. છત્રપાલસિંહ જેવા લોકોને સમાજના મોઢા બનવાનો કોઈ નૈતિક અધિકાર નથી.

એક બાજુ પક્ષના નેતાઓએ મિનિટોમાં વિડિયો, ફોટા, રાજકીય જોડાણો સાબિત કરવા સોસિયલ મીડિયામાં દોડધામ શરૂ કરી. બીજી બાજુ પ્રજા ઇચ્છે છે તો માત્ર રસ્તા બને, ગટર કામ કરે, હોસ્પિટલમાં સમયસર સારવાર મળે, રાશન મળે અને ખેડૂતને પાકના ભાવ મળે. નેતાઓની આ ચપ્પલ રાજનીતિ પ્રજાના પ્રશ્નો થી માત્ર ધ્યાન ભટકાવવાનો પ્રયત્ન છે.

છત્રપાલસિંહે સમાજના નામે બદલો લેવાનો દાવો કર્યો ત્યારે પ્રશ્ન એ છે—ભાઈ, સમાજપ્રેમ જાગ્યો ક્યાંથી? જ્યારે લોકસભા સમયે પરોષત્તમ રૂપાલાએ રાજપૂત સમાજ વિશે વિવાદિત વાત કહી હતી ત્યારે સમાજ માટે શું કર્યું? જ્યારે રાજ્યમાં રાજપૂત યુવતીઓની ભણતર, સુરક્ષા અને કુરિવાજ જેવા પ્રશ્નો છે, તે સમયે તમે ક્યાં હતા? સમાજને તો યાદ પણ ત્યારે આવે જ્યારે રાજકીય રોટલો સેકવો હોય.

આવા pseudo-society leaders ગુજરાતના સામાજિક તાણને વધારતા હોય છે. રાજનીતિ રમવી છે તો રમી લો, પરંતુ સમાજ–સમાજ વચ્ચે ખાઈ ઉભી ન કરો. તમારી રાજકીય સત્તા માટે કોઈ નિર્દોષની જાન જાય કે સામાજિક વૈમનસ્ય વધે, તે ગુજરાતની સંસ્કૃતિ નથી.

ચપ્પલ ફેંકવાનો આ તોફાની ટ્રેન્ડ માત્ર રાજકારણનું નહીં, પરંતુ ભારતીય સંસ્કૃતિનું ચીરહરણ છે. નેતાઓએ યાદ રાખવું જોઈએ કે આંખે દેખાતો હલકો તાળો સોશિયલ મીડિયા પર મળે, પરંતુ તેની રાજકીય, સામાજિક કિંમત અત્યંત ભારે પડી શકે છે.

સમાજને પણ આવા self-styled નેતાઓના ઝાંસામાં નહીં આવવું જોઈએ. ઘઉંમાંથી કાંકરા વિણ્યા જેવી રીતે આવા લોકોને સમાજમાંથી દૂર કરવા પડશે. રાજકારણીઓને પણ સમજવું પડશે કે ગુજરાત વૈમનસ્યની નહીં, સમરસતાની જમીન છે. અહીં ચપ્પલ ફેંકીને નથી, કામ કરીને માન મળે છે.