પીટર નાવારોઃ બ્રાહ્મણ-ભારત વિરોધી ઝેર?

અમેરિકા અને તેના નેતાઓની હાલની પરિસ્થિતિ સ્પષ્ટ બતાવે છે કે ભારત સામેની કૂટનીતિમાં તેઓ નિષ્ફળ રહ્યાં છે. જ્યારે ભારતે રશીયન ક્રુડ તેલની ખરીદી ચાલુ રાખી, ત્યારે અમેરિકાએ ટેરિફનું હથિયાર વાપર્યું. પહેલી ૨૫ ટકા આયાત જકાત અને ત્યારબાદ વધારાની ૨૫ ટકા જકાત લાદીને કુલ ૫૦ ટકા ટેરિફ મૂકવામાં આવ્યો, પરંતુ ભારતે ઝૂકવાનું નામ લીધું નહીં.

 આ પરિસ્થિતિમાં અમેરિકી સલાહકાર પીટર નાવારોએ ભારત સામે ઝેરી ભાષા વાપરી.તેમણે ભારતને “રશીયાનું વોશિંગ મશીન” ગણાવ્યું અને એટલું જ નહીં, તેમણે એવો આક્ષેપ પણ કર્યો કે ભારતીયોના ભોગે બ્રાહ્મણો નફો કરી રહ્યાં છે. આ પ્રકારના નિવેદનો માત્ર એક દેશવિરોધી પ્રચાર નથી, પરંતુ ભારતીય સમાજને અંદરથી વિભાજિત કરવાનો ઇરાદાપૂર્વકનો પ્રયાસ છે.

 પ્રશ્ન એ છે કે – શું અમેરિકા હવે રાજનીતિક કૂટનીતિ કરતા સસ્તા આક્ષેપો અને જાતિ આધારિત ઉશ્કેરણના માર્ગ પર ઉતરી ગયું છે? પીટર નાવારાનું નિવેદન માત્ર ભારતવિરોધી ઝેર નથી, પણ એ અમેરિકાની બોખલાહટ નો સાક્ષી છે.

 ભારત આજે વિશ્વમાં એક મજબૂત અર્થતંત્ર અને સ્વતંત્ર વિદેશ નીતિ ધરાવે છે. રશિયા સાથે ઊર્જા ક્ષેત્રે વ્યવહાર ભારતના હિત માટે જરૂરી છે. અમેરિકા ઈચ્છે છે કે ભારત પશ્ચિમી દબાણ હેઠળ ચાલે, પરંતુ ભારતે પોતાના રાષ્ટ્રીય હિતોને પ્રથમ સ્થાન આપ્યું છે. એ જ અમેરિકાની અસહ્યતા છે.

 પીટર નાવારાની ભાષા એક અર્થશાસ્ત્રીને શોભે તેવી નથી. તેઓ અગાઉ યુનિવર્સિટીના પ્રાધ્યાપક હતાં, પરંતુ પછીથી અનેક વખત અપમાનજનક વર્તન બદલ સજા ભોગવી ચૂક્યાં છે. આ નિવેદન તેમની જ હલકટ રાજનીતિનો એક નવો દાખલો છે.

 જો ભારતમાં નાની બાબતો પર લોકો સામે દેશદ્રોહના કેસ થાય છે, તો આટલા ગંભીર નિવેદન બદલ શું પીટર નાવારાને ભારતમાં કાનૂની કાર્યવાહીનો સામનો કરાવવો ન જોઈએ? આ મુદ્દે ભારત સરકાર અને નાગરિક સમાજે મજબૂત વલણ લેવુ જરુરી છે.

 સત્ય એ છે કે ભારત ઝૂકતું નથી.અને એ જ અમેરિકા અને તેના સલાહકારોની નિરાશા અને બોખલાહટનું કારણ છે.