હરિયાણામાં પ્રવાસનને મળશે ઉત્તેજન, ભારતનું પ્રથમ ડિઝનીલેન્ડ સ્થપાશે 

ભારતને ટૂંક સમયમાં હરિયાણામાં પહેલો ડિઝનીલેન્ડ પાર્ક મળી શકે છે. મુખ્યમંત્રી નાયબ સિંહ સૈનીએ રાજ્યના પર્યટનને વેગ આપવાની યોજનાઓની જાહેરાત કરી અને ગુડગાંવ નજીક માનેસરમાં 500 એકરના ડિઝનીલેન્ડ થીમ પાર્કનો પ્રસ્તાવ મૂક્યો. હરિયાણાને વૈશ્વિક પર્યટન કેન્દ્ર બનાવવા માટેની આ યોજના જાહેર કરવામાં આવી છે. 

મુખ્યમંત્રી સૈનીએ નવી દિલ્હીમાં કેન્દ્રીય સંસ્કૃતિ અને પર્યટન મંત્રી ગજેન્દ્ર સિંહ શેખાવતને મળ્યા હતા અને પર્યટનને પ્રોત્સાહન આપવા અને હરિયાણાના સાંસ્કૃતિક વારસાને જાળવવા માટેની વ્યૂહરચનાઓની ચર્ચા કરી હતી. ચર્ચાનું કેન્દ્રબિંદુ ડિઝનીલેન્ડ પ્રોજેક્ટ હતો, જેને સૈનીએ "ગેમ-ચેન્જિંગ" પહેલ તરીકે વર્ણવ્યું હતું. વધુમાં ઉમેર્યું કે, આ પ્રોજેક્ટ માત્ર હરિયાણા માટે જ નહીં પરંતુ સમગ્ર ભારત માટે નોંધપાત્ર આર્થિક, સાંસ્કૃતિક અને સામાજિક લાભો ઉત્પન્ન કરશે અને ગુરુગ્રામની કનેક્ટિવિટીનો ઉપયોગ કરી વિશ્વ કક્ષાનું મનોરંજન કેન્દ્ર બનાવશે ઉપરાંત હજારો પ્રત્યક્ષ અને પરોક્ષ નોકરીઓનું સર્જન કરશે. 

ગુરુગ્રામ જે પહેલાથી જ મજબૂત 500થી વધુ કંપનીઓનું ઘર છે અને ડિઝનીલેન્ડએ આગામી ગ્લોબલ સિટી પ્રોજેક્ટ છે, તેને આદર્શ સ્થાન તરીકે પ્રકાશિત કરવામાં આવ્યું હતું. આ પ્રોજેક્ટ આંતરરાષ્ટ્રીય પ્રવાસીઓને આકર્ષશે, પ્રવાસન આવકમાં વધારો કરશે અને હરિયાણાને વૈશ્વિક નકશા પર એક અગ્રણી સ્થળ તરીકે સ્થાપિત કરશે.

આ પ્રોજેક્ટને સોશિયલ મીડિયા ઉપર મિશ્ર પ્રતિસાદ મળી રહ્યા છે. જોકે વૉલ્ટ ડિઝની કંપની દ્વારા હજુ કોઈ સત્તાવાર જાહેરાત કરવામાં આવી નથી. બીજી તરફ ગુડગાંવના સ્થાનિકોએ પ્રવાસન કરતાં પેહલા સ્વચ્છ અને સુઘડ રસ્તાઓની મૂળભૂત માંગ કરી છે. અન્ય લોકોએ આ પ્રોજેક્ટને સરકારી ગતકડું કહ્યું છે, તેમના કહેવા પ્રમાણે ડિઝનીલેન્ડ જેવા મોટા પ્રોજેક્ટ નિર્માણથી આજુબાજુની મિલકતોના ભાવમાં અધધ વધારો થવાની આશંકા કરવામાં આવી રહી છે.