ભારતનો Q2માં મજબૂત વૃદ્ધિ સાથે GDP ગ્રોથ જાહેર

કેન્દ્રીય આંકડાકીય અને કાર્યક્રમ અમલ મંત્રાલય (MoSPI) હેઠળના રાષ્ટ્રીય આંકડાકીય કાર્યાલય (NSO)એ નાણાકીય વર્ષ 2025-26ના બીજા ત્રિમાસિક ગાળા (જુલાઈ-સપ્ટેમ્બર) માટે કુલ ઘરેલું ઉત્પાદન (GDP)ના આંકડાઓ જાહેર કર્યા છે. આ આંકડાઓ મુજબ, ભારતીય અર્થતંત્રએ વાસ્તવિક GDPમાં 8.2 ટકાની મજબૂત વૃદ્ધિ નોંધાવી છે. આ વૃદ્ધિ FY 2024-25ના સમાન ત્રિમાસિક ગાળા (Q2)માં નોંધાયેલા 5.6% ના વૃદ્ધિ દર કરતાં નોંધપાત્ર રીતે વધારે છે.

આ ત્રિમાસિક ગાળામાં વાસ્તવિક GDP ₹47.63 લાખ કરોડ રહેવાનો અંદાજ છે, જ્યારે નોમિનલ GDP (વર્તમાન ભાવે) 8.7%ના વધારા સાથે ₹85.25 લાખ કરોડ અંદાજવામાં આવ્યો છે.

સેકન્ડરી અને સર્વિસ સેક્ટરનો જંગી બુસ્ટ

સેકન્ડરી સેક્ટર (ઉદ્યોગ): આ ક્ષેત્રે 8.1%નો વૃદ્ધિ દર નોંધાવ્યો છે, જેમાં મેન્યુફેક્ચરિંગ (9.1%) અને કન્સ્ટ્રક્શન (7.2%) એ 7.0%થી વધુનો ગ્રોથ હાંસલ કર્યો છે.

સર્વિસ સેક્ટર (સેવાઓ): સેવા ક્ષેત્રે 9.2%ની વૃદ્ધિ નોંધાવી છે, જેમાં નાણાકીય, રિયલ એસ્ટેટ અને વ્યવસાયિક સેવાઓ એ 10.2%ના નોંધપાત્ર દરે વૃદ્ધિ જાળવી રાખી છે.

જોકે, કૃષિ અને આનુષંગિક ક્ષેત્ર (3.5%) તેમજ વીજળી, ગેસ અને પાણી પુરવઠા ક્ષેત્ર (4.4%)માં વૃદ્ધિ દરમાં થોડો ઘટાડો જોવા મળ્યો છે.

વૃદ્ધિમાં ખાનગી ક્ષેત્રના મજબૂત વપરાશનું પણ મોટું યોગદાન છે. વાસ્તવિક ખાનગી અંતિમ વપરાશ ખર્ચ (PFCE) Q2માં 7.9% વધ્યો છે, જે પાછલા વર્ષના 6.4%ના વધારા કરતાં ઘણો વધારે છે.

નાણાકીય વર્ષ 2025-26ના પ્રથમ અર્ધવાર્ષિક ગાળામાં વાસ્તવિક GDPએ 8.0%નો મજબૂત વૃદ્ધિ દર નોંધાવ્યો છે, જે FY 2024-25ના H1 માં 6.1% હતો.

આ દર્શાવે છે કે નાણાકીય વર્ષની શરૂઆત ભારતીય અર્થતંત્ર માટે અત્યંત આશાવાદી રહી છે. 

બેઝ યર રિવિઝનનો સંકેત

NSO એ સ્પષ્ટ કર્યું છે કે હાલમાં GDPના આંકડાઓ 2011-12ના આધાર વર્ષ પર આધારિત છે. MoSPI હાલમાં આ રાષ્ટ્રીય ખાતાઓનું આધાર વર્ષ બદલીને FY 2022-23 કરવા પર કામ કરી રહ્યું છે.

આગામી ત્રિમાસિક GDP અંદાજો નવી સીરિઝના આધારે 27 ફેબ્રુઆરી 2026ના રોજ જાહેર કરવામાં આવશે.