ભારતની ઈકોનોમીમાં એક ક્રાંતિકારી પરિવર્તન આવ્યું છે. ગુડ્સ એન્ડ સર્વિસ ટેક્સ (GST)ના દરોને સરળ બનાવવા માટે રચાયેલા મંત્રીઓના જૂથ (GoM)એ કેન્દ્ર સરકારના એક મહત્વપૂર્ણ પ્રસ્તાવને સ્વીકારી લીધો છે. આ પ્રસ્તાવ મુજબ 12% અને 28%ના GST સ્લેબને નાબૂદ કરવામાં આવ્યા છે અને પ્રજાલક્ષી નવું માળખું તૈયાર કરાયું છે.&nbsp;
હવે મોટાભાગની ચીજવસ્તુઓને 5% અને 18% ના બે મુખ્ય સ્લેબમાં સામેલ કરવામાં આવશે. આ નિર્ણય જો અમલમાં આવશે તો સામાન્ય નાગરિકો માટે મોંઘવારી ઘટશે અને જીવન વધુ સરળ બનશે. એક તરફ સામાન્ય લોકોને રાહત આપવાની વાત છે તો બીજી તરફ અલ્ટ્રા-લક્ઝરી કાર પર વધુ ટેક્સ લગાવવાનો પ્રસ્તાવ પણ રજૂ કરાયો છે.
બિહારના નાયબ મુખ્યમંત્રી સમ્રાટ ચૌધરીએ મીડિયાને જણાવ્યું કે GoMએ કેન્દ્રના પ્રસ્તાવને સમર્થન આપ્યું છે અને આ પ્રસ્તાવમાં માલ અને સેવાઓને 'મેરિટ' (લાભદાયક) અને 'સ્ટાન્ડર્ડ' (સામાન્ય) તરીકે વર્ગીકૃત કરવાની ભલામણ કરવામાં આવી છે. આ નિર્ણયનો મુખ્ય હેતુ કર વ્યવસ્થાને સરળ, પારદર્શક અને વિકાસલક્ષી બનાવવાનો છે, જેની વાત PM નરેન્દ્ર મોદીએ પણ તેમના સ્વતંત્રતા દિવસના ભાષણમાં કરી હતી.&nbsp;
કેટલી વસ્તુઓ પર 5% અને 18% ટેક્સ લાગશે ?
12% સ્લેબ: આ સ્લેબમાં આવતી 99% વસ્તુઓને 5% ના નવા સ્લેબમાં લાવવામાં આવશે, જેનાથી તે સસ્તી થશે.
28% સ્લેબ: આ સ્લેબમાં આવતી 90% વસ્તુઓને ઘટાડીને 18% ના સ્લેબમાં લાવવામાં આવશે, જેમાં રેફ્રિજરેટર, વોશિંગ મશીન અને સિમેન્ટ જેવી ઘર વપરાશની વસ્તુઓનો સમાવેશ થાય છે.
આ નિર્ણયથી નાણાકીય બજારમાં પણ સકારાત્મક માહોલ સર્જાશે, અને લોકોની ખરીદ શક્તિમાં વધારો થવાની અપેક્ષા છે. હવે સૌની નજર GST કાઉન્સિલ પર છે, જે આ પ્રસ્તાવો પર અંતિમ મહોર મારશે.

GST માળખામાં ઘટાડો કરાયો

હવે સરળ GST માળખાનો અમલ થશે, 12% અને 28%ના GST સ્લેબમાં ફેરફાર કરાયા.

August 21, 2025 | 22:00 IST