વિદેશમાં સારી નોકરીની શોધમાં રહેતા યુવાનો માટે એક લાલબત્તી સમાન કિસ્સો સામે આવ્યો છે. સુરત સાયબર ક્રાઈમની ટીમે એક આંતરરાષ્ટ્રીય રેકેટનો પર્દાફાશ કર્યો છે, જેમાં સુરત સહિત ભારતના વિવિધ રાજ્યોના 40 યુવાનોને થાઈલેન્ડમાં કોમ્પ્યુટર વર્કની નોકરીની લાલચ આપીને મ્યાનમારમાં બંધક બનાવવામાં આવ્યા હતા.
પાકિસ્તાની એજન્ટ સહિત 12 લોકોની સંડોવણી
આ રેકેટ છેલ્લા દોઢ વર્ષથી ચાલી રહ્યું હતું, જેમાં પાકિસ્તાની એજન્ટ સહિત કુલ 12 લોકોની સંડોવણી હોવાનું ખુલ્યું છે. પોલીસે આ મામલે પંજાબના 2 અને સુરતમાંથી એક મળીને 3 આરોપીઓની ધરપકડ કરી છે. પોલીસની પ્રાથમિક તપાસમાં જાણવા મળ્યું છે કે, આ રેકેટનો ભોગ બનેલા યુવાનોને પહેલા ટુરિસ્ટ વિઝા પર થાઈલેન્ડ લઈ જવામાં આવતા હતા.
ગેરકાયદે કોલ સેન્ટરોમાં ગોંધી રાખતા
ત્યાંથી તેમને કપટપૂર્વક નદી માર્ગે બોર્ડર ક્રોસ કરાવીને ગેરકાયદે રીતે મ્યાનમાર અને કંબોડિયા મોકલવામાં આવતા હતા. મ્યાનમારમાં આ યુવાનોને ચાઈનીઝ ગેંગને સોંપી દેવામાં આવતા હતા, જ્યાં તેમને ગેરકાયદેસર કોલ સેન્ટરોમાં ગોંધી રાખવામાં આવતા હતા. આ યુવાનોના નામે ફેક ID બનાવીને ભારત અને અન્ય દેશોમાં લોકોને ઈન્વેસ્ટમેન્ટના નામે કોલ કરાવીને ઓનલાઈન ઠગાઈ કરાવવામાં આવતી હતી.
આરોપીઓ ચાઈનીઝ એજન્ટ તરીકે કામ કરતા
પોલીસને મળેલ માહિતીના આધારે, સુરત સાયબર ક્રાઇમની ટીમે પંજાબના પટિયાલા ખાતેના ઝિરકપુરના પેન્ટ હાઉસમાં દરોડો પાડીને નીપેન્દર ઉર્ફે નીરવ લવકુશ ચૌધરી અને પ્રીત રસિકલાલ કમાણીની ધરપકડ કરી હતી. આ બંને આરોપીઓ ચાઈનીઝ કંપનીના એજન્ટ તરીકે કામ કરતા હતા. તેમની પૂછપરછમાં પોલીસને પાકિસ્તાની એજન્ટ એલેક્સ સહિત 12 લોકોના આ રેકેટમાં સામેલ હોવાની માહિતી મળી.
આરોપીને 3,000 USDT કમિશન મળતું
આરોપી નીપેન્દરને એક વ્યક્તિને મ્યાનમાર મોકલવા બદલ 3,000 USDT કમિશન મળતું હતું, જ્યારે અન્ય એજન્ટોને વ્યક્તિ દીઠ રૂપિયા 40,000 થી 50,000 કમિશન મળતું હતું. પ્રીત કમાણી પોતે પણ આ રેકેટનો ભોગ બન્યો હતો, પરંતુ ઈંગ્લીશ બોલવામાં તકલીફ પડતા તેને વધુ લોકોને લાવવા ફરજ પાડવામાં આવી હતી. આ ઉપરાંત, પોલીસે સુરતના ડિંડોલીથી વિઝા એજન્ટ આશિષ રમણલાલ રાણાની પણ ધરપકડ કરી છે, જેણે વડોદરા અને સુરતના 3 યુવાનોને મોકલ્યા હતા. હાલ, પોલીસ ત્રણેય આરોપીઓની વધુ પૂછપરછ કરીને રેકેટમાં સંડોવાયેલા અન્ય લોકોની તપાસ કરી રહી છે.

છેલ્લા દોઢ વર્ષથી ચાલી રહ્યું હતું આ રેકેટ

નોકરીના નામે યુવાનોને મ્યાનમાર લઈ જઈ સાયબર ફ્રોડ કરાવતા આંતરરાષ્ટ્રીય રેકેટનો પર્દાફાશ

September 1, 2025 | 20:51 IST