ત્રીજા નોરતાની રાત્રે ગાંધીનગર જિલ્લાના દહેગામ તાલુકાના બહિયલ ગામમાં ગરબાના આયોજન દરમિયાન ભારે હિંસા ફાટી નીકળતા તંગદિલી સર્જાઈ છે. સોશિયલ મીડિયા પર સ્ટેટસ મૂકવા જેવી એક નજીવી બાબત પરથી શરૂ થયેલી માથાકૂટ બે જૂથો વચ્ચેની હિંસક અથડામણમાં પરિણમી હતી.
પથ્થરમારો, તોડફોડ અને આગચંપી:
સ્થાનિક લોકોના જણાવ્યા અનુસાર, જ્યારે ગામમાં ગરબા ચાલી રહ્યા હતા ત્યારે અચાનક એક ટોળાએ ત્રણ બાજુથી પથ્થરમારો શરૂ કર્યો હતો. આ હુમલામાં મહિલાઓ સહિત અનેક લોકોને ઇજા પહોંચી હતી. હિંસક ટોળાએ ગામની દુકાનોમાં તોડફોડ કરી અને આગચંપી પણ કરી, જેના કારણે સમગ્ર ગામમાં ભયનો માહોલ ફેલાઈ ગયો હતો.
પોલીસ પર પણ હુમલો:
ઘટનાની જાણ થતાં પોલીસ કાફલો પરિસ્થિતિને કાબૂમાં લેવા માટે પહોંચ્યો, પરંતુ ટોળાએ પોલીસ પર જ પથ્થરમારો કર્યો. આ હુમલામાં પોલીસના ઓછામાં ઓછા 6 વાહનોને નુકસાન પહોંચ્યું હતું. પોલીસની 2 ગાડીને પણ ટોળાએ નિશાન બનાવી હતી. સ્થિતિ વધુ વણસે નહીં તે માટે પોલીસે ટોળાને વિખેરવા માટે ટીયરગેસના શેલ છોડવા પડ્યા હતા.
મોટી સંખ્યામાં પોલીસ તૈનાત:
ઘટના બાદ ગામમાં શાંતિ જાળવવા માટે મોટી સંખ્યામાં પોલીસ ટુકડીઓ તૈનાત કરવામાં આવી છે અને સઘન પેટ્રોલીંગ પણ હાથ ધરાયું છે. પોલીસે હિંસા ફેલાવનારા તત્વોને શોધી કાઢવા માટે કાર્યવાહી શરૂ કરી છે. હાલ ગામમાં સ્થિતિ નિયંત્રણમાં હોવાનું જણાવાયું છે, પરંતુ તણાવપૂર્ણ વાતાવરણ યથાવત છે. પોલીસે લોકોને શાંતિ જાળવવા અપીલ કરી છે. આ ઘટનાએ નવરાત્રિ જેવા પવિત્ર તહેવાર પર થયેલી હિંસા અંગે ચિંતા ઊભી કરી છે.

બહિયલમાં નવરાત્રી ગરબામાં હિંસક અથડામણ

બહિયલમાં ગરબા દરમિયાન સોશિયલ મીડિયા વિવાદને કારણે બે જૂથ વચ્ચે પથ્થરમારો, દુકાનોમાં તોડફોડ

September 25, 2025 | 16:13 IST