Vadodara માં નશાખોરો બેફામ, "મેં નશો કર્યો છે, તમારાથી થાય તે કરી લો"... Video

વડોદરા (Vadodara) શહેરમાં કાયદો અને વ્યવસ્થાનું ધોવાણ થઈ રહ્યું હોય તેવું લાગી રહ્યું છે. શહેરમાં વધુ એક નબીરાએ નશાની હાલતમાં ભયાનક અકસ્માત સર્જીને સામાન્ય નાગરિકોના જીવ જોખમમાં મૂક્યા છે. માંજલપુર તુલસીધામ ચાર રસ્તા પાસે બનેલી આ ઘટનામાં, નશામાં ધૂત મોપેડ ચાલકે રોડની સાઈડમાં પાર્ક કરેલી કાર પાછળ પોતાનું મોપેડ ધડાકાભેર અથડાવ્યું. આ ગંભીર અકસ્માતમાં મોપેડ ચલાવતા યુવાનને ભારે ઈજાઓ પહોંચતા તેને તાત્કાલિક સારવાર માટે હોસ્પિટલ ખસેડવામાં આવ્યો છે.

ઘટના સ્થળે હાજર સ્થાનિકોના આક્ષેપો મુજબ, મોપેડ પર સવાર યુવાનો છલોછલ નશામાં હતા. અકસ્માત સર્જ્યા બાદ પણ આ નબીરાનો ઉદ્ધતપણાનો પારો ઊંચો જ રહ્યો હતો. તેણે આસપાસ એકઠા થયેલા લોકો સાથે દાદાગીરી કરતા બેફામપણે કહ્યું કે, "જાઓ, મેં નશો કરેલો છે, તમારાથી થાય તે કરી લેજો!" આ શબ્દો સ્પષ્ટપણે દર્શાવે છે કે આવા અસામાજિક તત્વોને કાયદાનો કોઈ ડર નથી અને તેઓ જાહેરમાં કાયદાનું છડેચોક ઉલ્લંઘન કરી રહ્યા છે.

આ ઘટના વડોદરા (Vadodara)માં નશાખોરો અને નબીરાઓ કેટલા બેફામ બન્યા છે તેની ચોંકાવનારી વાસ્તવિકતા દર્શાવે છે. શું પોલીસ તંત્ર આવા તત્વો સામે કડક હાથે કામ લેવામાં નિષ્ફળ રહ્યું છે? આવા બેલગામ નબીરાઓ શહેરીજનોના જીવ અધ્ધરતાલ કરી રહ્યા છે અને વાહનવ્યવહારના નિયમોને નેવે મૂકીને અકસ્માતો નોતરી રહ્યા છે. પોલીસ ઘટના સ્થળે પહોંચી કાર્યવાહી હાથ ધરી છે, પરંતુ સવાલ એ થાય છે કે આવા કિસ્સાઓ અટકાવવા માટે તંત્ર ક્યારે જાગશે? શું વડોદરા (Vadodara)માં કાયદાનું રાજ છે કે પછી આવા નબીરાઓનું જંગલરાજ ચાલી રહ્યું છે? આ ઘટનાએ સમગ્ર શહેરની શાંતિ અને સલામતી પર ગંભીર પ્રશ્નાર્થ ઊભો કર્યો છે.

આ પણ વાંચો : Dwarka ના ગોમતી ઘાટ પર કરુણાંતિકા, 4 યુવતીઓ ડૂબી, 1 નું કમકમાટીભર્યું મોત!