અમદાવાદ: સાયબર ફ્રોડ કેસમાં ઝડપાયા બે શખ્સો, ચીની ગેંગ સાથે સંબંધિત હોવાનો ખુલાસો

અમદાવાદ શહેરના સાયબર ક્રાઈમ બ્રાન્ચે મોટી કાર્યવાહી કરતા આંતરરાષ્ટ્રીય સાયબર ફ્રોડ કેસમાં બે ભારતીય નાગરિકોની ધરપકડ કરી છે. આરોપીઓ ચીનના એક સિન્ડિકેટ સાથે સંકળાયેલા હોવાનું ખુલ્યું છે, જે થાઈલેન્ડ, મલેશિયા, ઈરાન અને ઈરાક જેવા દેશોમાંથી VoIP (Voice over Internet Protocol) કોલ્સના માધ્યમથી ભારતીય નાગરિકો સાથે ઠગાઈ કરતા હતા.

ગુપ્ત માહિતીના આધારે S.G. હાઇવે પર આવેલા કેમ્બે ગ્રાન્ડ હોટલના આઠમા માળે સ્થિત ડેટા સેન્ટર પર પોલીસે રેડ કરી હતી. ત્યાંથી "સેટ સ્ક્વેર લર્નિંગ સોલ્યુશન પ્રાઈવેટ લિમિટેડ"ના ત્રણ સર્વરો મળ્યા હતા, જેનો ઉપયોગ આરોપીઓ TRAI (ટેલિકોમ રેગ્યુલેટરી ઓથોરિટી ઓફ ઈન્ડિયા)ના અધિકારીઓ બનીને લોકોને ડિજિટલ એરેસ્ટ તથા રોકાણ સંબંધિત ઠગાઈ માટે કરતા હતા.

શું છે સમગ્ર ઘટના ?

આરોપીઓ લવકેશ કુમાર અને અનુરાગ ગુપ્તાએ SIP કનેક્શન માટે ડેટાફર્સ્ટ ડીસી પાસેથી 500 સેશન ખરીદ્યા હતા. ભારતીય નમ્બરો દર્શાવીને લોકોના સિમ કાર્ડ 2 કલાકમાં બ્લોક કરવાની ધમકી આપી તેઓ પાસેથી પૈસા પડાવતાં હતા. જર્મનીમાં ભાડે લેવાયેલ સર્વરને અમદાવાદના સર્વર સાથે લિંક કરીને આંતરરાષ્ટ્રીય કોલ્સને સ્થાનિક કોલ્સમાં રૂપાંતર કરવામાં આવતી હતી. આખા ઓપરેશનમાં ચીનની સિન્ડી વાંગ નામની વ્યક્તિની મહત્વપૂર્ણ ભૂમિકા ભજવી રહી હોવાનું સામે આવ્યું છે, જે હોંગકોંગની 'ક્વિક કોમ' અને 'સ્નો ફ્લાય' ઓનલાઇન કંપનીઓ માટે કામ કરતી હોવાનું જણાયું છે.

આરોપીઓ કોણ છે ?

લવકેશ કુમાર, જે માત્ર ધોરણ 10 સુધી અભ્યાસ કરેલો છે, તેણે પોતાનું ફર્મ શરૂ કરી ડેટા સેન્ટર અને SIP કનેક્શન માટેની વ્યવસ્થા ઊભી કરી. તેની સામે હરિયાણાના કરનાલમાં વિઝા ફ્રોડનો કેસ નોંધાયેલો છે અને તે હાલ જામીન પર બહાર હતો. અનુરાગ ગુપ્તા છેલ્લા 18 વર્ષથી કોલ સેન્ટરના વ્યવસાયમાં છે અને તે ટેક્નિકલ ઓપરેશન સંભાળતો હતો. તે પણ અન્ય એક સાઇબર ફ્રોડ કેસમાં જામીન પર છે. બે આરોપીઓની મુલાકાત હરિયાણાની જેલમાં થઈ હતી.

20થી 24 એપ્રિલ 2025 વચ્ચે માત્ર SIP લાઈનો દ્વારા દરરોજ સરેરાશ 65,000 VoIP કોલ કરવામાં આવતી હતી. ફક્ત ગુજરાતમાંથી 45થી વધુ ફરિયાદો નોંધાઈ છે જ્યારે અન્ય રાજ્યોમાંથી 23 ફરિયાદો મળી છે. કોલ્સમાં વોડાફોન -આઈડિયાના SIP ટ્રંક દ્વારા ભારતીય નંબર બતાવતા હતા.

આ કેસમાં ભારતીય દંડ સંહિતા તથા આઈટી એક્ટની વિવિધ કલમો હેઠળ ગુનો નોંધાઈ વધુ તપાસ ચાલુ છે. આખા નેટવર્કને ઝડપી પાડવા માટે સાયબર ક્રાઈમ બ્રાન્ચ દ્વારા વધુ સદસ્યોની શોધખોળ કરવામાં આવી રહી છે.