સુરતની સરથાણા પોલીસે (Sarthana Police) છેતરપિંડી કરનારા ઠગોને પકડવા માટે જે યુક્તિ અજમાવી, તે સાંભળીને સારા ડિટેક્ટિવો પણ માથું ખંજવાળશે! સામાન્ય રીતે હની ટ્રેપ (Honey Trap)નો ઉપયોગ ગુનાખોરી માટે થાય છે, પણ અહીં તો પોલીસે જ 'પૂજા' બનીને આરોપીને છટકામાં ફસાવ્યો.
લોન ફ્રોડ કરીને ભાગેલા આરોપીઓને પકડવા માટે સરથાણા પોલીસે એક અનોખી તરકીબ અજમાવી. પોલીસ સ્ટેશનની એક બહાદુર મહિલા PSI એ વોટ્સએપ (WhatsApp) પર એક સુંદર યુવતી 'પૂજા'ની ઓળખ આપી.
આ 'પૂજા' બનીને મહિલા PSI એ છેતરપિંડી કરનાર મુખ્ય આરોપી ગીરીશ મધુ હિંદડ સાથે વાતચીત શરૂ કરી. વાતચીત એટલી મજેદાર રહી કે ગીરીશ ખુશ થઈ ગયો અને તરત જ 'પૂજા'ને ડેટ (Date) માટે મળવા તૈયાર થઈ ગયો!
ગીરીશ મધુ હિંદડ જ્યારે ડેટ પર પહોંચ્યો, ત્યારે 'પૂજા' (એટલે કે મહિલા PSI) ની જગ્યાએ તેનો ભેટો સુરત પોલીસ સાથે થયો! પોલીસની આ 'હની ટ્રેપ' યુક્તિ સફળ રહી અને આરોપી સહેલાઈથી પોલીસના સકંજામાં આવી ગયો.
ગીરીશ હિંદડની પૂછપરછમાં બીજા આરોપી કુલદીપ રમેશ સોલંકીનું નામ પણ સામે આવ્યું, જેને પોલીસે તાત્કાલિક ઝડપી પાડ્યો.
જાણવા મળ્યું છે કે આ બંને આરોપીઓએ સાથે મળીને ₹30 લાખની લોન લીધા બાદ તેની ભરપાઈ ન કરીને છેતરપિંડી આચરી હતી. આ કેસમાં પોલીસે સાબિત કરી દીધું કે ગુનેગારો ચાલાક હોય તો પોલીસ તેનાથી બે ડગલાં આગળ છે! હવે આ ઠગબાજો જેલની 'ડેટ' પર જલસા કરશે.

પોલીસે પૂજા બની આરોપીને ઝડપી પાડ્યો

વોટ્સએપ પર લોન ફ્રોડ કરતા આરોપીને મહિલા PSI એ અનોખી રીતે પકડ્યો; બીજો પણ ઝડપાયો

October 30, 2025 | 19:34 IST