સુરતમાં નકલી નોટ બનાવવાના રેકેટનો પર્દાફાશ

Surat Gold Scam: ડાયમંડ સિટી તરીકે ઓળખાતા સુરત શહેરમાં નિર્દોષ લોકોને સસ્તું સોનું આપવાના બહાને ફસાવી, ત્યારબાદ કેમિકલની મદદથી નકલી નોટો બનાવી આપવાનો ડેમો બતાવી લાખો રૂપિયા પડાવતી એક શાતિર ટોળકીને લસકાણા પોલીસે ઝડપી પાડી છે. પોલીસે ડાયમંડ નગરના એક મકાનમાં દરોડો પાડી પશ્ચિમ બંગાળ, ઉત્તર પ્રદેશ અને મહારાષ્ટ્ર સાથે કનેક્શન ધરાવતા ત્રણ રીઢા ગુનેગારોની ધરપકડ કરી છે. આ ટોળકી પાસેથી રૂ. 1 કરોડની ફેક કરન્સી છાપી શકાય તેટલી સાઈઝના કોરા કાગળો અને કેમિકલનો જથ્થો મળી આવ્યો છે.

સસ્તું સોનું છોડાવવાના નામે રૂ. 3 લાખની છેતરપિંડી
આ સમગ્ર ઘટનાક્રમની વિગત મુજબ, સુરતના પાસોદરા વિસ્તારમાં રહેતા અને જમીન દલાલીના વ્યવસાય સાથે સંકળાયેલા રતીલાલ નાથાણી નામના વ્યક્તિને તેમના એક મિત્ર મારફતે સંજય દતા અને મુન્નાસિંહ નામના શખ્સોનો પરિચય થયો હતો. આ શખ્સોએ પોતાની પાસે સસ્તું સોનું હોવાની અને તે છોડાવવા માટે પૈસાની જરૂર હોવાની લાલચ રતીલાલને આપી હતી. તેમની વાતોમાં આવીને રતીલાલે વિશ્વાસમાં આવી આરોપીઓને સુરત રેલવે સ્ટેશન પાસે રૂ. 3 લાખ રોકડા આપ્યા હતા. જોકે, આટલા પૈસા લીધા પછી પણ આરોપીઓની લાલચ સંતોષાઈ નહોતી.

કેમિકલ અને કોરા કાગળથી નોટ બનાવવાનો 'લાઈવ ડેમો'
રૂ. 3 લાખ પડાવ્યા બાદ આરોપીઓએ રતીલાલ પાસે વધુ રૂ. 5 લાખની માંગણી કરી હતી. આ વખતે તેમણે નવી જાળ બિછાવી હતી અને જણાવ્યું હતું કે તેઓ આ રકમને કેમિકલ પ્રોસેસ દ્વારા ત્રણ ગણી કરી આપશે. ફરિયાદીનો વિશ્વાસ જીતવા માટે આરોપીઓએ ફિલ્મી સ્ટાઈલમાં ડાયમંડ નગર ખાડી પાસે એક રીક્ષામાં 'ડેમો' બતાવ્યો હતો. જેમાં તેમણે અસલી નોટ પર ખાસ પ્રકારનું કેમિકલ નાખી, તેને કોરા કાગળો વચ્ચે મૂકી રોલર ફેરવ્યું હતું, જેનાથી કોરા કાગળ પર નોટ જેવી જ છાપ ઉતરી આવી હતી. આ 'હાથની સફાઈ' જોઈ ફરિયાદીને શંકા ગઈ હતી કે આ કોઈ મોટું કૌભાંડ છે.

ત્રણ આરોપીઓ રંગેહાથ ઝડપાયા
આ વ્યવહાર ગેરકાયદે હોવાનું સમજાતા રતીલાલે તુરંત લસકાણા પોલીસનો સંપર્ક સાધ્યો હતો. પોલીસે બાતમીના આધારે ડાયમંડ નગરમાં આવેલા એક મકાનના ત્રીજા માળે ખાલી હોલમાં દરોડો પાડ્યો હતો. જ્યાં નોટો છાપવાની તૈયારી કરી રહેલા ત્રણ શખ્સોને પોલીસે દબોચી લીધા હતા. પકડાયેલા આરોપીઓમાં સંજય પંચકરી દતા (રહે. સલાબતપુરા, મૂળ પશ્ચિમ બંગાળ), મુન્નાસિંહ મહીપાલસિંહ રાજપૂત (રહે. પાંડેસરા, મૂળ યુપી), સુરેશ ગંગાઘર મુસારે (રહે. અહમદનગર, મહારાષ્ટ્ર) નો સમાવેશ થાય છે.

1 કરોડની કિંમતના કાગળો અને કેમિકલ જપ્ત
પીઆઈ મીનાબા ઝાલાના માર્ગદર્શન હેઠળ થયેલી આ કાર્યવાહીમાં ચોંકાવનારો મુદ્દામાલ જપ્ત કરાયો છે. આરોપીઓ પાસેથી 500ની નોટના માપના અસંખ્ય કોરા કાગળો મળી આવ્યા છે, જો આ તમામ કાગળો પર નોટ છાપવામાં આવી હોત તો તેની બજાર કિંમત રૂ. 1 કરોડ જેટલી થવા જાય છે. આ ઉપરાંત પોટેશિયમ પરમેંગેનેટનું સોલ્યુશન, કેમિકલ ભરેલા કેરબા, પ્લાસ્ટિકના ટબ, ગ્લોઝ અને શંકાસ્પદ ફેક કરન્સી પણ મળી આવી છે. આરોપી સંજય ઉર્ફે બંગાળીના ખિસ્સામાંથી 500ના દરની ત્રણ નકલી નોટો પણ મળી આવી છે.

આંતરરાજ્ય ગુનાહિત ઈતિહાસનો ખુલાસો
પોલીસ પૂછપરછમાં બહાર આવ્યું છે કે આ ટોળકી અત્યંત શાતિર છે અને અગાઉ અનેક રાજ્યોમાં છેતરપિંડી આચરી ચૂકી છે. મુખ્ય આરોપી સંજય દતાએ અગાઉ મહારાષ્ટ્રના ઔરંગાબાદમાં રૂ. 7 લાખની અને કોલકાતામાં રૂ. 50 હજારથી 3 લાખ સુધીની અનેક છેતરપિંડી કરી હોવાની કબૂલાત કરી છે. તેઓ ખાસ કરીને સુરતના વેપારીઓને લલચાવીને મોટી રકમ પડાવવાના ઈરાદે પશ્ચિમ બંગાળથી મહારાષ્ટ્ર વાયા સુરત આવ્યા હતા.

મોડસ ઓપરેન્ડી
આરોપીઓ પોટેશિયમ પરમેંગેનેટના સોલ્યુશનથી અસલી નોટને કાળી કરી દેતા હતા અને પછી તેને કેમિકલથી સાફ કરીને ફરી અસલી બનાવી દેતા હતા. આ પ્રક્રિયા દરમિયાન તેઓ ભોગ બનનારને એવું સમજાવતા કે આ કેમિકલ પ્રોસેસથી સાદા કાગળમાંથી પણ અસલી જેવી નોટો બની શકે છે. લોકો તેમની આ જાદુઈ લાગતી પ્રોસેસમાં ભોળવાઈને લાખો રૂપિયા ગુમાવતા હતા. હાલ લસકાણા પોલીસે ભારતીય ન્યાય સંહિતા (BNS) ની વિવિધ કલમો હેઠળ ગુનો નોંધી આ રેકેટમાં અન્ય કોઈ સંડોવાયેલું છે કે કેમ તે દિશામાં તપાસ તેજ કરી છે. પોલીસે નાગરિકોને અપીલ કરી છે કે આવી 'રૂપિયા ડબલ' કરવાની કે 'સસ્તા સોના'ની લાલચમાં આવીને પોતાની મહેનતની કમાણી ન ગુમાવે.