બોગસ હથિયાર લાયસન્સ કૌભાંડનો મુખ્ય સૂત્રધાર હરિયાણાનો શોકતઅલી ઝડપાયો

નકલી દસ્તાવેજના આધારે નાગાલેન્ડ અને મણિપુરના બોગસ લાયસન્સ મેળવી હથિયાર ખરીદવાના કૌભાંડમાં ATSને મોટી સફળતા મળી છે. ATSએ કૌભાંડના મુખ્ય સૂત્રધાર હરિયાણાના શોકતઅલીને નાગાલેન્ડથી ઝડપી પાડ્યો છે. જ્યારે હથિયાર ખરીદનાર વધુ 16 શખ્સો ઝડપાતા અત્યાર સુધીમાં મુખ્ય સૂત્રધાર સહિત 40 શખ્સોની ધરપકડ કરી છે. ધરપકડ કરાયેલા 40 શખ્સોમાંથી 7 શખ્સો એજન્ટ તરીકે કામ કરતાં હતા. આ તમામ શખ્સો પાસેથી 29 હથિયાર અને 935 જેટલા કારતૂસ કબજે લીધા છે. ઉલ્લેખનીય છે કે, હથિયારોના શોખીનોએ રૂપિયા 50 હજારથી લઈને 10 લાખ સુધી ચુકવી હથિયારના બોગસ લાયસન્સ મેળવ્યા હોવાનું બહાર આવ્યું છે. 

ATSએ હથિયારના બોગસ લાયસન્સ કેસમાં વધુ 16 શખ્સોની ધરપકડ કરી છે. હથિયાર કૌભાંડના મુખ્ય આરોપી હરિયાણાના શોકતઅલીને નાગાલેન્ડથી ઝડપી લીધો છે. શોકતઅલી રાજ્યના 7 એજન્ટોના માધ્યમથી અન્ય શખ્સોને હથિયાર પૂરા પાડતો હતો. બોગસ લાયસન્સ અને હથિયાર માટે 19 લાખ રૂપિયા સુધીની વસૂલાત કર્યા છે. ATSએ ધરપકડ કરેલા 16 શખ્સો પાસેથી 8 રિવોલ્વર, 2 પિસ્તોલ, 5 બાર બોર ગન સહિત 15 હથિયાર અને 489 કારતૂસ કબજે કરવામાં આવ્યાં છે.

આ કૌભાંડમાં અત્યાર સુધી મુખ્ય સૂત્રધાર શોકતઅલી અને 39 શખ્સોની ધરપકડ કરવામાં આવી છે. શોકતઅલી પોતાનું ગન હાઉસ ચલાવતો હતો. તેની ગન વધુ વેચાય તે માટે ગુજરાતના ગ્રાહકોને બોગસ લાયસન્સ અપાવતો હતો. આ કૌભાંડમાં શોકતઅલી ઉપરાંત અન્ય બે શખ્સો પણ સંડોવાયેલા હોવાથી ATSએ તે દિશામાં તપાસ શરૂ કરી છે. 

આ કૌભાંડમાં ધરપકડ કરાયેલા વિશાલ પંડ્યા નામના શખ્સનું રાજકીય કનેક્શન સામે આવ્યુ છે. વિશાલ પંડ્યા VHPનો કાર્યકર છે. થોડા સમય અગાઉ પાલડીના વણીકર ભવનના રિનોવેશન માટે ખાતમુહૂર્ત કરાયુ હતું. તે સમયે ATSએ ધરપકડ કરેલા વિશાલ પંડ્યાએ 4 કરોડના દાનની જાહેરાત કરી હતી. આ બાબતે વિશ્વ હિન્દુ પરિષદના સૂત્રોએ જણાવ્યું છે કે, થોડા સમય પહેલાં તે VHPમાં જોડાયો હતો. તે VHPનો કાર્યકર છે. તે સમયે જાહેરાત કરાયેલા દાનમાંથી હજુ સુધી એકપણ રૂપિયો આવ્યો નથી. જ્યારે કેટલાક લોકોનું કહેવું છે કે, 4 કરોડ દાનની રકમમાંથી 1 કરોડ જમા કરાવી દીધા છે.

ATSના DySP એસ.એલ.ચૌધરીએ જણાવ્યું કે, વિશાલ પંડયા, ધ્વનિત મહેતા, અર્જુન અલગોતર, ધૈર્ય જરીવાલા, શેલા ભરવાડ અને મુકેશ બામ્બાએ હરિયાણાના નૂહમાં દુકાન ધરાવતા સૌકતઅલી, ફારૂકઅલી, સોહમઅલી તથા આસીફને મોટી રકમ આપી મણિપુર અને નાગાલેન્ડના બોગસ હથિયાર લાયસન્સ બનાવડાવી તેમની પાસેથી હથિયારો ખરીદ કર્યા હતા. આ ઉપરાંત પોતાની ગેંગના માણસો અને ગુજરાતના અન્ય માણસોના બોગસ હથિયાર લાયસન્સ તથા હથિયારો અપાવ્યા હતા. 

વધુમાં તેમણે જણાવ્યુ કે, 7 એજન્ટોની ધરપકડ કરી રિમાન્ડ મેળવીને પૂછપરછ કરતાં બોગસ હથિયાર લાયસન્સ થકી હથિયાર મેળવનાર ગેંગના 49 શખ્સોની સંડોવણી ખુલી છે. તેમાંથી અત્યાર સુધી મુખ્ય સૂત્રધાર જેમાંથી બોગસ લાયસન્સના આધારે હથિયાર મેળવનાર 40 શખ્સોની ધરપકડ કરવામાં આવી છે. તેમની પાસેથી 29 હથિયારની સાથે 935 કારતૂસ જપ્ત કરવામાં આવ્યા છે. આ ઉપરાંત 108 શખ્સોએ શંકાસ્પદ હથિયાર મેળવેલા હોવાથી તે દિશામાં તપાસ હાથ ધરીને હથિયાર રિકવર કરવાની કાર્યવાહી શરૂ કરી છે.

 

સુરેશ વણોલ, અમદાવાદ