Punjab : રાષ્ટ્રવિરોધી પ્રવૃત્તિનો પર્દાફાશ, અમૃતસરમાં જાસૂસીનું મોટું કૌભાંડ, બે ઝડપાયા

પંજાબ પોલીસે એક મોટી સફળતા હાંસલ કરી છે. અમૃતસરમાં પાકિસ્તાન માટે જાસૂસી કરતા એક મોટા નેટવર્કનો પર્દાફાશ કર્યો છે. આ કેસમાં પોલીસે બે જાસૂસોની ધરપકડ કરી છે, જે પાકિસ્તાન માટે કામ કરી રહ્યા હતા. આરોપ છે કે પકડાયેલા બંને જાસૂસ ભારતીય સેનાની ગુપ્ત માહિતી પાકિસ્તાનને મોકલી રહ્યા હતા. આ બંનેનું કનેક્શન પાકિસ્તાનની ગુપ્તચર એજન્સી ISI સાથે પણ હોવાનું માનવામાં આવી રહ્યું છે. બંનેની ઓળખ પલક શેર મસીહ અને સુરજ મસીહ તરીકે થઈ છે. આરોપીઓએ સેનાની છાવણીઓ અને એરબેઝના ફોટા દુશ્મનને મોકલ્યા છે.

પાકિસ્તાનને મોકલી રહ્યા હતા ગુપ્ત માહિતી...

પંજાબ પોલીસે આ ઘટના વિશે માહિતી આપી છે. પંજાબ DGP ના એક્સ હેન્ડલ પર એક પોસ્ટમાં જણાવવામાં આવ્યું હતું કે, "એક મહત્વપૂર્ણ જાસૂસી વિરોધી અભિયાન હેઠળ, અમૃતસર ગ્રામીણ પોલીસે 3 મેના રોજ બે વ્યક્તિઓ પલક શેર મસીહ અને સુરજ મસીહની ધરપકડ કરી છે. બંને આરોપીઓ અમૃતસરમાં સેનાની છાવણી વિસ્તારો અને વાયુસેનાના ઠેકાણાંની સંવેદનશીલ માહિતી અને ફોટા પાકિસ્તાનને મોકલી રહ્યા હતા. પ્રાથમિક તપાસમાં જાણવા મળ્યું છે કે તેમના પાકિસ્તાની ગુપ્તચર એજન્ટો સાથે સંબંધો છે, જે હરપ્રીત સિંહ ઉર્ફે પિટ્ટુ ઉર્ફે હેપ્પી દ્વારા સ્થાપિત કરવામાં આવ્યા હતા. હરપ્રીત સિંહ ઉર્ફે પિટ્ટુ હાલમાં અમૃતસર સેન્ટ્રલ જેલમાં બંધ છે."

બંનેની પૂછપરછ કરી રહી છે પંજાબ પોલીસ...

આ અંગે વધુમાં જણાવવામાં આવ્યું હતું કે, "હાલમાં સત્તાવાર ગુપ્તતા અધિનિયમ હેઠળ કેસ નોંધવામાં આવ્યો છે, અને તપાસ ચાલી રહી છે. તપાસ થવા પર વધુ મહત્વપૂર્ણ ખુલાસા થવાની સંભાવના છે." પોસ્ટમાં કહેવામાં આવ્યું છે કે, "પંજાબ પોલીસ ભારતીય સેના સાથે મક્કમતાથી ઊભી છે અને રાષ્ટ્રીય હિતોના રક્ષણની પોતાની ફરજમાં અડગ છે. અમારા સશસ્ત્ર દળોની સુરક્ષાને નબળી પાડવાના કોઈપણ પ્રયાસનો સખત અને તાત્કાલિક જવાબ આપવામાં આવશે."