બનાસકાંઠાના અમીરગઢના જંગલોમાં વન વિભાગ અને પોલીસની સંયુક્ત ટીમે ગેરકાયદે શિકાર કરતી ગેંગને પકડી પાડવા માટે 16 કલાક સુધી ચાલેલું વિશાળ ઓપરેશન સફળ બનાવ્યું. નીલગાયના શિકારની બાતમી મળતાં જ પેટ્રોલિંગમાં રહેલી ટીમને જંગલમાંથી બંદૂકના અવાજ સંભળાયા. ત્યારબાદ તાબડતોબ કોમ્બિંગ શરૂ કરાયું.
ટીમ જ્યારે જંગલની અંદર તપાસ કરતાં આગળ વધી ત્યારે શિકારીઓ દ્વારા બંદૂકના ધડાકા બંધ થઈ ગયા હતા. છતાં ચોક્કસ માહિતીના આધારે પોલીસે અને વન વિભાગે જંગલ ખૂંદવાનું ચાલુ રાખ્યું. લાંબા ઓપરેશન બાદ કુલ 10 સભ્યોની ગેંગ ઝડપાઇ. ચાર શખ્સો અંધારાનો લાભ લઈ ભાગી છૂટ્યા.
જ્યાં ટીમ પહોંચી ત્યાં શિકારીઓ એક નીલગાયનો શિકાર કરી તેનો માંસ પ્લાસ્ટિકની થેલીઓમાં ભરી રહ્યા હતા. સ્થળ પરથી પાંચ બંદૂકો જપ્ત કરવામાં આવી. જેમાંથી ચાર લાયસન્સ વગરની હોવાનું સ્પષ્ટ થયું. ગેરકાયદે શિકાર તથા ગેરકાયદે હથિયાર રાખવા બદલ આર્મ્સ એક્ટ અને વાઇલ્ડ લાઇફ પ્રોટેક્શન એક્ટ હેઠળ ગુનો નોંધાયો.
આરોપીઓને કોર્ટમાં રજૂ કરતાં તેમના જામીન રદ થયા અને તમામને સબ-જેલમાં મોકલાયા. RFO શક્તિસિંહ પરમારે જણાવ્યું કે માહિતી મળતા જ અમીરગઢ પોલીસ સાથે કોમ્બિંગ શરૂ કરાયું અને સતત પ્રયત્નોના પગલે શિકારીઓને કાબૂમાં લેવામાં સફળતા મળી છે.

અમીરગઢમાં નીલગાયનો શિકાર કરતાં પકડાયેલા શિકારીઓ

વન વિભાગે 16 કલાક ઓપરેશન કરી 10 શિકારીઓ ઝડપી પાડ્યા, પાંચ બંદૂક સહિત હથિયારો જપ્ત

November 19, 2025 | 22:21 IST