સુરતના ઉમરા વિસ્તારમાં આવેલ જિલ્લા પંચાયતના ક્વાર્ટર્સમાં એક અત્યંત કરુણ અને ગંભીર ઘટના બની છે. એક શિક્ષક, અલ્પેશ સોલંકી, પોતાની પત્નીના અફેરથી ત્રાસીને પોતાના બે બાળકોને ઝેર આપી પોતે પણ આપઘાત કરી લીધો. આ ઘટનાએ સમગ્ર વિસ્તારમાં ચકચાર મચાવી છે.
ઉમરા પોલીસ સ્ટેશનમાં આ મામલે ફરિયાદ નોંધાયા બાદ અલ્પેશની પત્ની ફાલ્ગુની અને તેના પ્રેમી નરેશ રાઠોડની ધરપકડ કરવામાં આવી છે. પોલીસે તેમની સામે આત્મહત્યાની દુષ્પ્રેરણા (BNS 108) હેઠળ ગુનો નોંધ્યો છે.
ડાયરીમાં લખેલી કડવી હકીકત
મૃતક અલ્પેશ છેલ્લા એક મહિનાથી એક ડાયરી લખતા હતા, જે પોલીસને સુસાઇડ નોટ તરીકે મળી છે. આ ડાયરીમાં તેમણે પોતાની પત્ની ફાલ્ગુનીના વર્તન અને તેના અફેર વિશે વિગતવાર લખ્યું છે. અલ્પેશે આ ડાયરીમાં જણાવ્યું છે કે છેલ્લા 4 વર્ષથી તેની પત્નીનું નરેશ રાઠોડ સાથે અફેર ચાલી રહ્યું હતું. અલ્પેશે તેને સમજાવવાનો ઘણો પ્રયાસ કર્યો હતો, પરંતુ તે માનતી ન હતી.
પોલીસના જણાવ્યા અનુસાર, મૃત્યુ પહેલા અલ્પેશે એક વીડિયો પણ બનાવ્યો હતો, જેમાં તેણે પત્ની અને નરેશના સંબંધો વિશે જણાવ્યું હતું. આ વીડિયો અને ડાયરીમાં લખેલી માહિતીના આધારે પોલીસે કાર્યવાહી કરી છે.
પોલીસ તપાસ અને આરોપીઓની કબૂલાત
ડીસીપીના નિવેદન અનુસાર, અલ્પેશ કાંતિલાલ સોલંકીએ પોતાના બે બાળકોની હત્યા કરી પોતે આપઘાત કર્યો હતો. પોલીસે મૃતદેહોનું પોસ્ટમોર્ટમ કરાવ્યું છે. તપાસ દરમિયાન પોલીસને બે ડાયરી, મૃતકનો અને તેની પત્નીનો મોબાઇલ જપ્ત કર્યો છે. પોલીસ પૂછપરછમાં નરેશ રાઠોડે પણ ફાલ્ગુની સાથેના સંબંધોની કબૂલાત કરી છે.
અલ્પેશના ભાઈએ પણ જણાવ્યું છે કે ફાલ્ગુની છેલ્લા 3 મહિનાથી અલ્પેશને ખૂબ જ હેરાન કરતી હતી. સુસાઇડ નોટમાં અલ્પેશે પોતાના માતા-પિતા અને પત્નીને સંબોધન કરીને અલગ-અલગ લખાણ કર્યું છે અને નરેશ તથા ફાલ્ગુનીને કડકમાં કડક સજા થાય તેવી વિનંતી કરી છે.
આ ઘટનાએ પરિવારિક સંબંધોમાં વિશ્વાસના ભંગ અને તેના ગંભીર પરિણામો વિશે ગંભીર પ્રશ્નો ઊભા કર્યા છે. આ મામલે પોલીસ દ્વારા વધુ તપાસ ચાલી રહી છે.

પત્નીના ત્રાસના કારણે પતિએ કરી હત્યા

શિક્ષકે પોતાના બે બાળકોને ઝેરી દવા પીવડાવી અને પોતા ગળેફાંસો ખાઈ જીવન ટુંકાવ્યું હતુ

August 2, 2025 | 24:16 IST