રાષ્ટ્રીય રાજધાની દિલ્હીના નિઝામુદ્દીન વિસ્તારમાં એક ચોંકાવનારી ઘટના બની છે, જ્યાં બોલિવૂડ અભિનેત્રી હુમા કુરેશીના પિતરાઈ ભાઈ આસિફ કુરેશીની પાર્કિંગ વિવાદને કારણે હત્યા કરવામાં આવી છે. આ ઘટના ગુરુવારે રાત્રે લગભગ 9 વાગ્યે નિઝામુદ્દીન પોલીસ સ્ટેશન વિસ્તારના જંગપુરા ભોગલ બજાર લેનમાં બની હતી.
પ્રાથમિક માહિતી અનુસાર, આસિફ કુરેશીના ઘરના મુખ્ય દરવાજા સામે એક સ્કૂટી પાર્ક કરવામાં આવી હતી. આ સ્કૂટીને હટાવવાને લઈને પાડોશીઓ સાથે તેમની બોલાચાલી થઈ હતી, જે બાદ વિવાદ ખૂબ જ વધી ગયો હતો. આ વિવાદ દરમિયાન, આરોપીઓએ આસિફ કુરેશી પર હુમલો કર્યો. ગંભીર રીતે ઈજાગ્રસ્ત થયેલા આસિફ કુરેશીને તાત્કાલિક હોસ્પિટલ લઈ જવામાં આવ્યા, પરંતુ ડૉક્ટરોએ તેમને મૃત જાહેર કર્યા.
આસિફ કુરેશીની પત્ની શાઈના આસિફ કુરેશીએ આ સમગ્ર ઘટના વિશે જણાવ્યું કે, 'મારા પતિની ઈરાદાપૂર્વક અને &nbsp;હત્યા કરવામાં આવી છે. આ અગાઉ પણ મારા પતિ સાથે લડાઈ થતી હતી અને આજે પણ બધા લોકોએ ભેગા મળીને તેમને માર્યા છે.' તેમણે વધુમાં જણાવ્યું કે, રાત્રે 9 વાગ્યાની આસપાસ કોઈએ ઘરના ગેટ પર સ્કૂટી મૂકી દીધી હતી. જ્યારે મારા પતિએ તેનો વિરોધ કર્યો, ત્યારે તેમની સાથે મારઝૂડ કરવામાં આવી. ઘટના બાદ અમે તેમને તરત જ હોસ્પિટલ લઈ ગયા, પરંતુ તેઓ બચી શક્યા નહિ.
મૃતકના સંબંધી વિનિતાએ પણ આ ઘટનાની વિગતો આપી, 'કોઈએ ગેટ પર સ્કૂટી પાર્ક કરી હતી, જેને હટાવવાનું કહેવામાં આવ્યું હતું. ત્યારબાદ સામેના પક્ષના લોકોએ દલીલબાજી શરૂ કરી દીધી, અને પછી તેમનો ભાઈ આવ્યો અને તેણે આસિફ કુરેશીને કોઈ લોખંડની વસ્તુથી માર માર્યો, જેના કારણે તેઓ લોહીલુહાણ થઈ ગયા.'
વિનિતાએ ઉમેર્યું કે, ભૂતકાળમાં પણ આ લોકોએ આસિફને મારવાનો પ્રયાસ કર્યો હતો. આ ઘટના બાદ દિલ્હી પોલીસે પરિવારની ફરિયાદના આધારે હત્યાનો કેસ નોંધ્યો છે અને આગળની તપાસ શરૂ કરી દીધી છે. પોલીસ આસિફ કુરેશીની હત્યાના આરોપીઓની શોધખોળ કરી રહી છે.

આસિફ કુરેશીની દિલ્હીના નિઝામુદ્દીનમાં પાર્કિંગ વિવાદને કારણે હત્યા, પોલીસ તપાસ શરૂ

August 8, 2025 | 15:46 IST