PI સામે 19 વર્ષીય યુવતી સાથે છેડતીની ફરિયાદ

અમદાવાદના વેજલપુર પોલીસ સ્ટેશનમાં પોલીસ ઈન્સ્પેક્ટર બરકત અલી ચાવડા વિરુદ્ધ છેડતીની ગંભીર ફરિયાદ નોંધાઈ છે. PI ચાવડા હાલમાં ગાંધીનગર કંટ્રોલરૂમમાં ફરજ બજાવે છે, પરંતુ અગાઉ તેઓ અમદાવાદ ACB અને રખિયાલ પોલીસ સ્ટેશનમાં પણ ફરજ બજાવી ચૂક્યા છે. એક 19 વર્ષીય યુવતીએ તેમના પર એપાર્ટમેન્ટની લિફ્ટમાં શારીરિક અડપલાં કર્યા હોવાનો આક્ષેપ કર્યો છે. વેજલપુર પોલીસે યુવતીની ફરિયાદના આધારે ગુનો નોંધીને આ મામલે તપાસ શરૂ કરી દીધી છે. 

ખભા પર હાથ મૂકીને કર્યા શારીરિક અડપલાં

વેજલપુર પોલીસ સ્ટેશનના PI રણજીતસિંહ ચૌહાણે પણ આ ચાવડા સામે ગુનો નોંધાયો હોવાની અને તપાસ ચાલી રહી હોવાની પુષ્ટિ કરી છે. યુવતીએ પોતાની ફરિયાદમાં જણાવ્યું છે કે, જ્યારે PI બરકત અલી ચાવડા અને તે લિફ્ટમાં સાથે હતા, ત્યારે લિફ્ટ બંધ થતાં જ ચાવડા એ તેના ખભા પર હાથ મૂકીને શારીરિક અડપલાં કર્યા હતા.

આ પણ વાંચો: Rapido ડ્રાઈવરે યુવતીની જાતીય સતામણી કરતા ઝડપાયો

અન્ય વ્યક્તિ લિફ્ટમાં પ્રવેશતા જ બહાર નીકળ્યા

યુવતીના આક્ષેપ મુજબ, આ અડપલાં લિફ્ટ છઠ્ઠા માળે પહોંચી ત્યાં સુધી ચાલુ રહ્યા હતા. સદભાગ્યે, છઠ્ઠા માળે અન્ય વ્યક્તિઓ લિફ્ટમાં પ્રવેશતા બરકત અલી ચાવડા લિફ્ટમાંથી બહાર નીકળી ગયા હતા. PI ચાવડા અગાઉ પણ આ પ્રકારના વિવાદમાં આવી ચૂક્યા હોવાની માહિતી પણ મળી છે.

મહિલા સુરક્ષા હેલ્પલાઈન અભયમનો કર્યો સંપર્ક

પોલીસકર્મીની આ હરકતથી ગભરાઈ ગયેલી યુવતીએ તાત્કાલિક મહિલા સુરક્ષા હેલ્પલાઇન 181 અભયમનો સંપર્ક કર્યો હતો. અભયમની ટીમે યુવતીને કાઉન્સેલિંગ કર્યું અને કાયદાકીય પ્રક્રિયા વિશે માહિતી આપી. ત્યારબાદ યુવતીએ હિંમત કરીને વેજલપુર પોલીસ સ્ટેશનમાં PI બરકત અલી ચાવડા વિરુદ્ધ છેડતીનો ગુનો નોંધાવ્યો હતો. પોલીસ આ મામલે સઘન તપાસ કરી રહી છે.