પશ્ચિમ બંગાળના જલપાઇગુડી જિલ્લાના મૈનાગુરીમાં એક અત્યંત ભયાનક બનાવ સામે આવ્યો છે. અહીં એક પતિએ તેની પત્નીની ઘાતકી હત્યા કરી, તેના શરીરના ટુકડા કર્યા અને પછી તેના હૃદય અને શરીરના અન્ય અંગોને એક બેગમાં ભરીને આસપાસના વિસ્તારમાં ફરતો રહ્યો. આ ઘટના બાદ આખા જિલ્લામાં હાહાકાર મચી ગયો.
પોલીસે આરોપીની શોધખોળ શરૂ કરી છે. પ્રાપ્ત માહિતી મુજબ, આ ઘટના શુક્રવારે સવારે બની હતી. સ્થાનિક રહેવાસી રમેશ રોય નામના આ વ્યક્તિએ તેની 45 વર્ષીય પત્ની દીપાલી રોયની હત્યા કરી હતી. આ પછી તે તેના શરીરના અંગો લઈને આરામથી ફરી રહ્યો હતો. સ્થાનિક લોકોના જણાવ્યા અનુસાર, રમેશ રોયે તો કેટલાક લોકોને બેગ ખોલીને તેની પત્નીનું હૃદય પણ બતાવ્યું હતું.
એક ચોંકાવનારી ઘટનામાં, તે પાડોશીના ઘરે પણ ગયો અને લોકોને તેની પત્નીના કાપેલા શરીરના અંગો પણ બતાવ્યા. આ ભયાનક દ્રશ્ય જોઈને લોકો સ્તબ્ધ થઈ ગયા હતા અને તરત જ સ્થાનિક પંચાયતને જાણ કરી, જેમણે પોલીસને જાણ કરી. રમેશ રોયને એક પુત્ર અને એક પરણિત પુત્રી પણ છે.
મૈનાગુરી પોલીસ સ્ટેશનના ઇન્સ્પેક્ટર ઈન-ચાર્જ સુબલ ચંદ્ર ઘોષે જણાવ્યું કે, આ ગુનો આજે સવારે થયો છે. અમને માહિતી મળતા જ અમે ઘટના સ્થળે પહોંચ્યા અને મૃતદેહના કેટલાક અંગો મળ્યા. રમેશ રોયે તેના પડોશીઓને પણ શરીરના અંગો બતાવ્યા હતા. જાણવા મળ્યું છે કે, તેણે તીક્ષ્ણ હથિયાર વડે પત્નીના શરીરના ટુકડા કરી બેગમાં ભરી દીધા હતા અને થોડો સમય વિસ્તારમાં ફરતો રહ્યો હતો.
પડોશીઓ જ્યારે રમેશ રોયના ઘરે ગયા ત્યારે તેમણે પથારી પર લોહીના ડાઘ જોયા. આ મામલે અમારી તપાસ ચાલુ છે. પોલીસે મૃતક દીપાલી રોયના બાકીના શરીરના અંગો પણ શોધી કાઢ્યા છે અને તેને પોસ્ટમોર્ટમ માટે જલપાઇગુડી ગવર્નમેન્ટ મેડિકલ કોલેજ અને હોસ્પિટલ મોકલી દીધા છે.
મૈનાગુરી ગ્રામ પંચાયતના વડા નીલિમા રોયે જણાવ્યું કે, "મને સ્થાનિક લોકો દ્વારા જાણ કરવામાં આવી કે મારા પાડોશમાં એક વ્યક્તિ બેગમાં શરીરના અંગો લઈને ફરી રહ્યો છે. આ સાંભળીને મેં તરત પોલીસને જાણ કરી. આવી ઘૃણાસ્પદ ઘટના આપણા વિસ્તારમાં બની છે તે જોઈને લોકો સ્તબ્ધ છે."

પતિએ પત્નીની કરી હત્યા

જલપાઈગુડીમાં એક પતિએ તેની પત્નીની હત્યા કરી, શરીરના ટુકડા બેગમાં લઈને ફર્યો અને પછી ફરાર

August 22, 2025 | 22:16 IST