દેશમાં મેટ્રો સ્ટેશન ઉપર કેબલ ચોરી કરતી આંતરરાજ્ય ‘ખેકડા’ ગેંગનો પર્દાફાશ

દેશભરમાં મેટ્રો સ્ટેશન ઉપર કેબલ ચોરી આંતરરાજ્ય ‘ખેકડા’ ગેંગનો ગાંધીનગર લોકલ ક્રાઈમ બ્રાન્ચે પર્દાફાશ કર્યો છે. મહારાષ્ટ્ર, દિલ્હી, પુના સહિતના મેટ્રો સ્ટેશનમાં કેબલ ચોરીને અંજામ આપનાર ‘ખેકડા’ ગેંગના 4 શખ્સોને ઝડપી 35 ગુનાનો ભેદ ઉકેલી નાખ્યો છે. કોબા મેટ્રો સ્ટેશન નજીકથી 18 લાખના કેબલની ચોરી કરી હતી. ‘ખેકડા’ ગેંગના 13 શખ્સોએ અમદાવાદ, ગાંધીનગર, દિલ્હીના 14, પુનાના 12, મુંબઈના પનવેલના 6 સ્થળોએ તેમજ ભોપાલ, ઇન્દોરમાં કેબલ ચોરીને અંજામ આપ્યો હતો. પકડાયેલા આરોપીઓ ઉત્તરપ્રદેશના બાગપત જિલ્લાના ખેકડા ગામના રહેવાસી હોવાનું બહાર આવ્યું છે.

ગાંધીનગરના કોબા મેટ્રો સ્ટેશન નજીક 2 જૂનના રોજ IPL મેચ દરમિયાન કેબલ ચોરીનો બનાવ બન્યો હતો. આ ગેંગના શખ્સો રાતના સમયે 17.85 લાખ રૂપિયાની કિમતનો 700 મીટર કેબલ કાપીને ચોરી ગયા હતા. LCB-1 અને LCB-2ની 4 ટીમોએ સીસીટીવી ફૂટેજ અને ટેકનિકલ સર્વેલન્સના આધારે શંકાસ્પદ વાહનો ઓળખી 4 શખ્સોને ઝડપી પાડ્યા છે. અમદાવાદ અને ગાંધીનગર મેટ્રો સ્ટેશનના ચોરી કરેલા કેબલ કલોલ ખાતે મકાન ભાડે રાખીને તેમાં છુપાવ્યા હતા.

ગાંધીનગર પોલીસે કલોલ ખાતેના મકાનમાંથી ₹2.95 લાખની કિંમતનો 368.7 કિલો કોપર વાયર, પ્લાસ્ટિક કવર, કાર, મોબાઇલ સહિત ₹8.32 લાખનો મુદ્દામાલ જપ્ત કર્યો છે. પકડાયેલા 4 શખ્સોની  પૂછપરછ દરમિયાન ખુલાસો થયો છે કે 13 શખ્સોએ મળીને કેબલ ચોરીના ગુનાઓ આચર્યા છે. શાહપુર, ગ્યાસપુર સહિતના મેટ્રો સ્ટેશનોમાં અગાઉ કરેલી ચોરીઓની પણ કબૂલાત કરી છે. ‘ખેકડા’ ગેંગે દિલ્હીમાં 14, પૂનામાં 12, પનવેલમાં 6 તેમજ ભોપાલ અને ઇન્દોરમાં પણ મેટ્રો કેબલની ચોરી કરી હોવાની કબૂલાત કરી છે. મેટ્રો ટ્રેન સેવા ધરાવતા અલગ-અલગ શહેરોમાં જઈ હોટલમાં રોકાણ કરી ત્યારબાદ મકાન અને કાર ભાડે લઈ મેટ્રો લાઇન નજીક રેકી કરીને કેબલ ચોરીને અંજામ આપતા હોવાની મોડસ ઓપરેન્ડી બહાર આવી છે. કેબલમાંથી કોપર વાયર અલગ કરી પેક કરી ટ્રેન મારફતે દિલ્હી મોકલતા હોવાની આરોપીઓએ કબૂલાત કરી છે.

પોલીસે 13 શખ્સો સામે ગુનો નોંધી મુશરફ મુલેજાટ, રાશીદ ધોબી, રાશીદ અંસારી અને ઇરશાદ મલિક નામના શખ્સોની ધરપકડ કરી છે. જ્યારે બાકીના 9 શખ્સોને વોન્ટેડ જાહેર કર્યા છે. તમામ આરોપી ઉત્તરપ્રદેશના બાગપત જિલ્લાના ખેકડા ગામના રહેવાસી છે. તમામ શખ્સોએ દેશભરમાં મેટ્રો કેબલની ચોર કરી હોવાથી મેટ્રો મેનેજમેન્ટ સહિત અન્ય રાજ્યની પોલીસને જાણ કરી વધુ તપાસ હાથ ધરી છે.