Rajkot સાયબર ક્રાઈમની લાલ આંખ, ઓનલાઈન જુગારનું પ્રમોશન કરનારા ઈન્ફ્લુએન્સર ભીંસાયા!

રાજકોટ શહેર સાયબર ક્રાઈમ પોલીસે ઓનલાઈન જુગારનું બેફામ પ્રમોશન કરનારા વધુ છ ઈન્સ્ટાગ્રામ ઈન્ફ્લુએન્સર સામે કડક કાર્યવાહી હાથ ધરી છે. પોલીસે આ છ ઈન્ફ્લુએન્સર વિરુદ્ધ ગુનો નોંધીને તેમની કાયદેસર અટકાયત કરી છે. આ સાથે જ સાયબર ક્રાઈમ પોલીસે અત્યાર સુધીમાં કુલ આઠ જેટલા સોશિયલ મીડિયા ઈન્ફ્લુએન્સરને આ કેસમાં પકડી પાડ્યા છે.

પોલીસે આ તમામ આરોપીઓ વિરુદ્ધ જુગારધારાની કલમ 12(A) હેઠળ ગુનો નોંધીને વધુ તપાસ હાથ ધરી છે. પકડાયેલા આરોપીઓમાં નિલેશ ચાવડા, ભાવેશ રાઠોડ, લક્ષ્મણ જંજવાડીયા, સાગર છૈયા, ઈલેશ દેરવાડિયા અને વિજય મજેઠીયાનો સમાવેશ થાય છે. પોલીસ તપાસમાં ચોંકાવનારી હકીકત સામે આવી છે કે, આ ઈન્ફ્લુએન્સરને તેમના ફોલોઅર્સની સંખ્યા મુજબ કમિશન આપવામાં આવતું હતું. આ સોશિયલ મીડિયા ઈન્ફ્લુએન્સર પોતાના ઈન્સ્ટાગ્રામ એકાઉન્ટના માધ્યમથી ઓનલાઈન ગેમ્બલિંગનું જોરશોરથી પ્રમોશન કરીને દર મહિને લાખો રૂપિયાની કમાણી કરતા હતા.

આ ઈન્ફ્લુએન્સર યુવાધનને ઓનલાઈન જુગારના ખતરનાક રવાડે ચડાવી રહ્યા હતા, જેને પગલે સાયબર ક્રાઈમ પોલીસે આ ગંભીર બાબતને ધ્યાનમાં લઈને કડક કાર્યવાહી શરૂ કરી છે. પોલીસે સ્પષ્ટ જણાવ્યું છે કે, ઓનલાઈન અથવા કોઈપણ લિંકના માધ્યમથી રમાડવામાં આવતી તમામ જુગારની રમતો ગેરકાયદેસર છે.

આ અંગે વધુ માહિતી આપતા રાજકોટ સાયબર ક્રાઈમના SP ચિંતન પટેલે જણાવ્યું હતું કે, "ઓનલાઈન ગેમ્બલિંગનું પ્રમોશન કરનારા સામે અમારી કાર્યવાહી આગામી દિવસોમાં પણ ચાલુ રહેશે અને આવા ગેરકાયદેસર કૃત્યોમાં સંડોવાયેલા કોઈપણ વ્યક્તિને બક્ષવામાં નહીં આવે." રાજકોટ સાયબર ક્રાઈમ પોલીસની આ કાર્યવાહીથી ઓનલાઈન જુગારનું પ્રમોશન કરનારાઓમાં ફફડાટ ફેલાયો છે અને યુવાધનને બરબાદ થતા બચાવવા માટે આ એક સરાહનીય પગલું છે.