અમદાવાદમાં પતિએ પત્નીને છરીના ઘા ઝીકયા

અમદાવાદના ખોડિયારનગર વિસ્તારમાં એક હૃદયદ્રાવક ઘટના સામે આવી છે. પતિએ પત્ની પર જાહેરમાં ઘાતક હુમલો કરીને તેના ગળા અને ખભા પર છરીના ઘા ઝીંકી દીધા હતા. હુમલાનો વીડિયો સામે આવતા શહેરમાં ચકચાર મચી ગઈ છે. ઘટના દરમિયાન હાજર રહેલા લોકો વચ્ચે પડયા છતાં આરોપી પતિ અટક્યો નહોતો અને સતત હુમલો કરતો રહ્યો હતો. હાલ ઈજાગ્રસ્ત પરિણીતાની હોસ્પિટલમાં સારવાર ચાલી રહી છે.

અમદાવાદના કૃષ્ણનગર વિસ્તારમાં આવેલા વિશ્વ પાર્ક સોસાયટીમાં રહેતી ચંદ્રિકા પટેલ નામની પરિણીતાએ નિકોલ પોલીસ સ્ટેશનમાં પોતાના પતિ મયંક પટેલ અને સાસુ ભાવના પટેલ વિરુદ્ધ ફરિયાદ નોંધાવી છે. ચંદ્રિકા મૂળ અમરેલી જિલ્લાના રાજુલા તાલુકાની રહેવાસી છે અને હાલ નિકોલના સુરજનગર વિસ્તારમાં રહે છે.

મયંક અને ચંદ્રિકાએ 2024માં પ્રેમલગ્ન કર્યા હતા. શરૂઆતમાં બંને વચ્ચે સારા સંબંધ હતા, પરંતુ બાદમાં સાસરીયાઓના ત્રાસ અને મારઝુડને કારણે ચંદ્રિકા પોતાના પિયરમાં રહેવા લાગી હતી.

ગઈકાલે સાંજે ચંદ્રિકા કામેથી ઘરે જઈ રહી હતી ત્યારે મયંક અચાનક આવી પહોંચ્યો હતો. તેણે ચંદ્રિકાને ‘તારા લીધે મારો ભાઈ મરી ગયો’ કહીને હુમલો શરૂ કર્યો હતો. રસ્તા પર જ તેણે ચંદ્રિકાને ધક્કો મારીને જમીન પર પાડી હતી, વાળ પકડીને ઢસડવાનું શરૂ કર્યું હતું અને બાદમાં છરીથી ગળા અને ખભા પર ઘા ઝીંક્યા હતા.

લોકોએ વચ્ચે પડીને મહિલાને બચાવી હતી અને 108 એમ્બ્યુલન્સ દ્વારા હોસ્પિટલમાં ખસેડી હતી. હાલ તેણીની સ્થિતિ સ્થિર છે. નિકોલ પોલીસે પતિ મયંક પટેલ અને તેની માતા વિરુદ્ધ ગુનો નોંધી તપાસ શરૂ કરી છે.