ગૃહ રાજ્યમંત્રી હર્ષ સંઘવીનું માદરે વતન સુરત બન્યું સાયબર છેતરપિંડીનું એપી સેન્ટર

ટેક્સટાઈલ અને ડાયમંડ સિટી બાદ હવે સુરત સાયબર ફ્રોડ સિટી પણ બની ગયું છે. આંતરરાષ્ટ્રીય સાયબર માફિયાઓ માટે સુરત હબ બની ગયુ હોય તેમ લાગી રહ્યું છે. છેલ્લાં 9 મહિનામાં સુરત પોલીસે મોટા સાયબર રેકેટનો પર્દાફાશ કર્યો છે. આ રેકેટ અંતર્ગત 2007 જેટલાં બેંક ખાતામાં રૂપિયા 2600 કરોડથી વધુના ટ્રાન્જેકશન થયા હતા. તેમાંથી 70 ટકા એટલે કે 1405 બેંક ખાતા સુરતના હોવાનો ખુલાસો થયો છે. વિદેશમાં બેસેલા સાયબર માફિયાઓ બેંક એકાઉન્ટના માધ્યમથી સુરતના લોકોની મદદ લઈ સાયબર ક્રાઈમ માટે ઉપયોગ કરી રહ્યા છે. ગૃહ રાજ્ય મંત્રી હર્ષ સંઘવીના માદરે વતન સુરતમાં કરોડો રૂપિયાના સાયબર ફ્રોડ રેકેટ સામે આવી રહ્યા છે.

સાયબર ફ્રોડના રેકેટની તપાસ દરમિયાન સુરત પોલીસને કેટલીક ચોંકાવનારી માહિતી મળી છે. બેંક એકાઉન્ટ હોલ્ડરોએ કમિશન પર એકાઉન્ટ આપ્યા હોવાનો ખુલાસો કર્યો છે. એકાઉન્ટ હોલ્ડરની જાણ બહાર તેમના નામે ખાતા ખોલી સાયબર ક્રાઈમ માટે તેનો ઉપયોગ થઈ રહ્યો હોવાનું સામે આવ્યું છે.

ઓક્ટોબર-2024માં સાયબર ક્રાઈમ પોલીસે આંતરરાષ્ટ્રીય રેકેટનો પર્દાફાશ કર્યો હતો. જેમાં મિલન દરજી ગેંગની ધરપકડ કરવામાં આવી હતી. તેમની પાસેથી કુલ 1039 બેંક એકાઉન્ટ મળી આવ્યા હતા. તેઓએ 200 કરોડથી પણ વધુનો સાયબર ફ્રોડ કર્યો હતો. દુબઈ સ્થિત ચાઈનીઝ ગેંગ માટે તે કામ કરતો હતો. તમામ બેંક એકાઉન્ટ મારફતે થયેલા સાયબર ફ્રોડની 1898 અરજીઓ સરકારી પોર્ટલ (NCCR) પર નોંધાઈ છે.

8 મહિનામાં ચાર મોટા સાયબર ફ્રોડ રેકેટ ઝડપાયા

નવેમ્બર-2024માં બેંક એકાઉન્ટ ખોટી રીતે ખોલાવામાં આવતા હોવાની ફરિયાદના આધારે પોલીસે રેડ કરી નરેશ ધડુક સહિતની ગેંગને ઝડપી હતી. તપાસ દરમિયાન જાણવા મળ્યું હતું કે, આરોપીઓ પાસે 611 જેટલા બેંક એકાઉન્ટ છે. જેમાંથી 477 એવા બેંક એકાઉન્ટ સામે NCCRમાં ફરિયાદ નોંધાયેલી છે. દુબઈથી ચાલતા રેકેટમાં 222 કરોડના સાયબર ફ્રોડના ટ્રાન્ઝેક્શન કરવામાં આવ્યા હતા.

જૂન-2025 માં ઉધના પોલીસે રાજ્યનો સૌથી મોટા સાયબર ફ્રોડ રેકેટનો પર્દાફાશ કર્યો હતો. રૂપિયા 2050 કરોડ રૂપિયાના સાયબર ફ્રોડમાં આરોપી કિરાત જાદવાણી સાગરિતો સાથે મળી કરંટ બેંક એકાઉન્ટ ખોલાવી ક્યુબામાં બેસેલા રીચ પે નામના વ્યક્તિને વિગતો મોકલતો હતો. આ એકાઉન્ટમાં સાયબર ફ્રોડથી મળેલી રકમનું ટ્રાન્ઝેક્શન કરી તેને USDTમાં કન્વર્ટ કરી દેવામાં આવતું હતું. એક લાખથી સાત લાખ સુધીનું કમિશન આપી બેંક એકાઉન્ટ ખરીદવામાં આવતા હતા. NCCR પોર્ટલમાં આ બેંક એકાઉન્ટ વિરુદ્ધ 265 જેટલી ફરિયાદો નોંધાઈ હતી. સુરતની અલગ અલગ બેંકમાં 164 જેટલા કરંટ એકાઉન્ટ ખોલવામાં આવ્યા હતા.

સુરત ક્રાઈમ બ્રાન્ચે તાજેતરમાં બિશ્નોઈ ગેંગના ત્રણ શખ્સોની ધરપકડ કરી છે. તેઓ સુરતમાં બેંક એકાઉન્ટ ખોલાવવા માટે આવ્યા હતા. આ ગેંગના બે શખ્સો પાસેથી 365 જેટલા સ્ક્રીનશોટ મળી આવ્યા છે. જેનું નેકસસ મ્યાનમાર અને પાકિસ્તાનથી ચાઈનીઝ ગેંગ દ્વારા ચલાવવામાં આવતું હતું. તમામ આરોપી પાસેથી 193 જેટલા બેંક એકાઉન્ટ મળી આવ્યા છે. જેના થકી આરોપીઓએ 100 કરોડથી વધુ સાયબર ફ્રોડની રકમનું ટ્રાન્ઝેક્શન કર્યુ છે. આ બેંક એકાઉન્ટ ઉપર NCCRમાં 508 જેટલી ફરિયાદો નોંધાયેલી છે. સુરત ક્રાઈમ બ્રાંચે ઝડપેલા આરોપીઓ પાસેથી 193 બેંક ખાતા મળી આવ્યા છે.

સુરતના ચાર રેકેટ સંદર્ભે NCCRમાં 3148 ફરિયાદો નોંધાઈ

સુરતના ચાર સાયબર ફ્રોડ કેસમાં અત્યાર સુધી રૂપિયા 2600 કરોડના 2007 એકાઉન્ટમાં ટ્રાન્ઝેક્શન કરાયા છે. જેની સામે NCCRમાં 3148 જેટલી ફરિયાદો થઈ છે. કરંટ અને સેવિંગ એકાઉન્ટ ખોલીને સાયબર માફિયાઓને આપવામાં આવતા હતા. વિદેશમાં બેસીને એકાઉન્ટમાંથી ID અને પાસવર્ડ મારફતે સાયબર ફ્રોડના પૈસા ટ્રાન્ઝેક્શન કરવામાં આવતા હતા. એકાઉન્ટ ખોલવા માટે શ્રમિક વર્ગના લોકો, ગરીબ વર્ગના લોકો અને સુરતમાં ટેક્સટાઇલ અને ડાયમંડ ઇન્ડસ્ટ્રીઝ સાથે સંકળાયેલા લેબર વર્ગના લોકોને સૌથી વધારે ટાર્ગેટ કરવામાં આવતા હતા. સાયબર પોલીસની તપાસમાં જાણવા મળ્યું છે કે સુરતમાં સૌથી વધારે સરથાણા, વરાછા, લસકાણા, પુણાગામ, કાપોદ્રા, રિંગરોડ, લિંબાયત, ગોડાદરા વિસ્તારના લોકોને ટાર્ગેટ કરી બેંક એકાઉન્ટ ખોલાવવામાં આવ્યા છે.

સહાય અને લોનની લાલચે બેંક એકાઉન્ટ ખોલાવ્યા

એક યુવતીએ જણાવ્યું હતું કે, તેના કાકાને એક વ્યક્તિએ કહેલું કે, બેંક એકાઉન્ટ ખોલાવવાથી સહાય મળશે અને આ માટે એક એપ્લિકેશન ડાઉનલોડ કરવાની રહેશે. સહાય મળવાના નામે મારા કાકાએ મારા નામથી બેંક એકાઉન્ટ ખોલાવ્યું હતું. ત્યારબાદ લખનઉ સાયબર સેલ દ્વારા મને નોટિસ આપવામાં આવી છે અને જણાવ્યુ છે કે, મારા એકાઉન્ટમાંથી સાયબર ફ્રોડના પૈસા ટ્રાન્ઝેક્શન થયા છે. જે અંગે મને કંઈપણ ખબર નથી. મેં ક્યારેય બેંક ખાતાનો ઉપયોગ કર્યો નથી.

એક રિક્ષાચાલકે જણાવ્યું હતું કે, બેંક એકાઉન્ટ ખોલાવવાથી તેમને લોન સહેલાઈથી મળી જશે. હાલ તેમની પાસે જે પણ ડોક્યુમેન્ટ છે તેના આધારે તેઓ બેંક એકાઉન્ટ ખોલી આપશે અને ટૂંક સમયમાં લોન મળી જશે. લોન મળશે તો તેઓ ટેક્સી ખરીદી શકશે અને રિક્ષા ચલાવવાનું છોડી શકશે. તેઓએ બેંક એકાઉન્ટ ખોલાવવા માટે તમામ વિગતો આપી હતી. હવે ખબર પડી કે અચાનક તેમનું બેંક એકાઉન્ટ સીઝ થઈ ગયું છે.

સાયબર ફ્રોડના રેકેટમાં ચાઈનીઝ ગેંગ કનેક્શન

ચાઈનીઝ ગેંગ દ્વારા દેશભરમાં સાયબર ફ્રોડની ઘટનાઓને અંજામ આપવામાં આવી રહ્યો છે. જેમાં સૌથી મહત્વની ભૂમિકા સુરતના બેંક એકાઉન્ટનો હોવાની ચોંકાવનારી વિગતો સામે આવી છે. સુરત ઔદ્યોગિક શહેર હોવાથી પરપ્રાંતિય લોકો રોજગારી માટે આવતા હોય છે. શ્રમિકો ભણેલા નહી હોવાથી તેમના બેંક એકાઉન્ટનો ઉપયોગ કઈ રીતે થવાનો છે તેની જાણ હોતી નથી. તેથી સાયબર માફિયાઓ સુરતમાં સૌથી વધુ બેંક એકાઉન્ટ ખોલાવતા હોય છે. બેંક એકાઉન્ટ ખોલવાના નામે તેમને 5 હજારથી 10 હજાર  રૂપિયાનું કમિશન આપવામાં આવે છે. કેટલાક લોકો પૈસાની લાલચમાં પણ બેંક એકાઉન્ટ ભાડે આપતા હોવાનું પોલીસ તપાસમાં સામે આવ્યું છે.

સુરતમાં પકડાયેલાં તમામ સાયબર ફ્રોડ રેકેટનું આંતરરાષ્ટ્રીય કનેક્શન સામે આવ્યું છે. દુબઈ, ક્યુબા, થાઈલેન્ડ, સિંગાપોર, પાકિસ્તાન, મ્યાનમારમાંથી સમગ્ર રેકેટ ઓપરેટ થતું હોવાનું બહાર આવ્યું છે. તમામ સાયબર ફ્રોડ રેકેટ ચાઈનીઝ ગેંગ દ્વારા ચલાવવામાં આવે છે અને ફ્રોડને ચલાવવા માટે ભારત અને ખાસ કરીને સુરતના લોકોના બેંક એકાઉન્ટનો ઉપયોગ કરવામાં આવી રહ્યો છે. સુરત પોલીસે અત્યાર સુધી ચારથી વધુ મોટા સાયબર ફ્રોડ રેકેટનો પર્દાફાશ કર્યો છે. જેમાં 100 કરોડથી લઈને 2050 કરોડ રૂપિયા સુધીના ટ્રાન્ઝેક્શન થયા છે. અલગ અલગ ગેંગના લોકો કમિશન આપીને બેંક એકાઉન્ટની વિગતો મેળવી લેતા હોય છે. ત્યારબાદ લોગીન અને પાસવર્ડ બનાવી વિદેશમાં બેસેલા માસ્ટરમાઈન્ડને આપી સાયબર ક્રાઈમ આચરતા હોય છે.

200 કરોડનું સાયબર ફ્રોડ કરનાર ટોળકી સામે ગુજસીટોક હેઠળ ગુનો નોંધાયો

સુરતમાં મિલન દરજી ગેંગ દ્વારા સાયબર ફ્રોડનું રેકેટ ચલાવવામાં આવતું હતું. આ ગેંગ સામે દેશમાં 2 હજારથી વધુ ફરિયાદ નોંધાઇ છે. ટોળકીએ સાયબર ફ્રોડ માટે એક હજારથી વધુ બેંક ખાતા ખોલાવી 200 કરોડથી વધુના ટ્રાન્ઝેકશન કર્યા છે. સુરતના ગુનામાં 261 બેંક ખાતામાં 77 કરોડના ટ્રાન્ઝેકશન કરાયા છે. મિલન દરજી ગેંગના અજય ઇટાલીયા, જલ્પેશ નડીયાદરા, વિશાલ ઠુંમર, હિરેન બરવાળિયા, બ્રિજેશ ઇટાલિયા, કેતન વેકરિયા, નાનજી બારૈયા, હિત જસાણી, ચંદ્રેશ કાકડિયા, દશરથ ધાંધલિયા અને અનિલ ખેનીની ધરપકડ કરવામાં આવી છે. આ કેસમાં 11 આરોપી ઝડપાયા છે. જ્યારે મુખ્ય આરોપી મિલન દરજી સહિત 35 આરોપી હજુ ફરાર છે. ગુજસીટોક હેઠળ કેસ ચલાવવા પોલીસે પ્રિન્સિપાલ ડિસ્ટ્રીક્ટ એન્ડ સેશન્સ કોર્ટે સમક્ષ મંજૂરી માગી હતી. કોર્ટે મંજૂરી આપતાં ગુજસીટોકનો ગુનો નોંધી કાર્યવાહી શરૂ કરી છે. આ ગેંગ સામે મહારાષ્ટ્રમાં 397, કર્ણાટકમાં 352, તેલંગાણામાં 121, તમિલનાડુમાં 155, ગુજરાતમાં 124, બંગાળમાં 91 મળી NCCRP પોર્ટલ ઉપર 31 રાજયોમાં 1867 ફરિયાદ અને 214 FIR નોંધાઇ છે. આરોપીઓએ દેશની 27 બેન્કોમાં 1029 ખાતા ખોલાવી 197,42,15,313 કરોડનું ટ્રાન્ઝેકશન કર્યું હોવાનો ખુલાસો થયો છે.