Ahmedabad માં બેફામ BMW નો કહેર, ઇકોને ફંગોળી, બેને ઇજા, યુવક-યુવતી ફરાર!

અમદાવાદ (Ahmedabad)ના પોશ ગણાતા બોડકદેવ વિસ્તારમાં મોડી રાત્રે જાણે કે કાયદાની કોઈ પરવાહ ન હોય તેમ એક ઝડપભેર આવતી BMW કારે ભયાનક અકસ્માત સર્જ્યો. બેફામ ગતિએ દોડતી આ મોંઘી કારે એક ઇકો કારને એવી જોરદાર ટક્કર મારી કે ઇકો કાર હવામાં ફંગોળાઈ ગઈ. આ અકસ્માતમાં ઇકો કારમાં સવાર બે વ્યક્તિઓને ગંભીર ઈજાઓ પહોંચી છે. પરંતુ આટલેથી જ જાણે આ કારચાલકનો ગુસ્સો શાંત ન થયો હોય તેમ, ટક્કર માર્યા બાદ BMW કારે પોતાનો કાબૂ ગુમાવ્યો અને નજીકના એક વીજ થાંભલા સાથે ધડાકાભેર અથડાઈ. આ અથડામણમાં કારને પણ ખાસ્સું નુકસાન થયું છે.

તમને જણાવી દઈએ કે, અકસ્માત સર્જાયા બાદ માનવતાને શરમાવે તેવી ઘટના બની. BMW કારમાં સવાર એક યુવક અને એક યુવતી ઘટનાસ્થળે ઊભા રહેવાના બદલે તાત્કાલિક ત્યાંથી નાસી છૂટ્યા. તેમની આ બેજવાબદાર વર્તણૂકને કારણે વિસ્તારમાં ભારે ચર્ચા અને ચિંતાનું મોજું ફરી વળ્યું છે. લોકોમાં એ વાતનો રોષ છે કે શું પૈસાના જોરે કોઈ પણ નિયમોનું ઉલ્લંઘન કરી શકે છે અને અકસ્માત સર્જીને ભાગી છૂટી શકે છે?

આ ઘટનાની જાણ થતાં જ સ્થાનિક પોલીસે તાત્કાલિક ઘટનાસ્થળે પહોંચીને તપાસ શરૂ કરી દીધી છે. પોલીસે અજાણ્યા યુવક અને યુવતી વિરુદ્ધ કેસ નોંધીને તેમની શોધખોળ હાથ ધરી છે. હવે જોવાનું એ છે કે આ બેફામ ચાલકો ક્યારે પકડાય છે અને તેમને તેમના કૃત્યની શું સજા મળે છે.બોડકદેવ જેવા શાંત વિસ્તારમાં આ પ્રકારનો બેદરકારીભર્યો અકસ્માત એ વાતનો પુરાવો છે કે શહેરમાં કેટલાક લોકો હજુ પણ ટ્રાફિકના નિયમોને ગણકારતા નથી અને પોતાની મોંઘી ગાડીઓના જોરે બીજાની જિંદગીને જોખમમાં મૂકવામાં પણ અચકાતા નથી. આ ઘટના તંત્ર માટે પણ એક લાલ બત્તી સમાન છે કે આવા બેફામ ચાલકો સામે કડક કાર્યવાહી કરવામાં આવે જેથી ભવિષ્યમાં આવી ઘટનાઓ ટાળી શકાય.