LC ન મળતાં વાલીએ શાળાનું કોમ્પ્યુટર તોડ્યું

સુરતના ડીંડોલી વિસ્તારમાં આવેલી સનરાઈઝ શાળામાં લિવિંગ સર્ટિફિકેટ ન મળવાને કારણે એક વાલીએ ભારે હંગામો મચાવ્યો હતો. ગુસ્સે ભરાયેલા વાલીએ માત્ર સ્કૂલના આચાર્ય સાથે ગેરવર્તણૂક કરી અને ધમકી આપી એટલું જ નહિ, પણ રિસેપ્શન કાઉન્ટર પર રાખેલું કોમ્પ્યુટર ઉંચકીને ફેંકી દઈને તોડફોડ કરી હતી. આ સમગ્ર ઘટનાના CCTV ફૂટેજ પણ સામે આવ્યા છે, જેના આધારે સ્કૂલ દ્વારા વાલી વિરુદ્ધ પોલીસ ફરિયાદ દાખલ કરવામાં આવી છે.

LC ફોર્મ પર સહી કરવાનો ઈનકાર

મળતી માહિતી અનુસાર, આ બનાવ 15 નવેમ્બર, 2025ના રોજ બપોરે 11:54 કલાકે સનરાઈઝ વિદ્યાલયમાં બન્યો હતો. ધોરણ-1 (D) અંગ્રેજી માધ્યમમાં અભ્યાસ કરતી વિદ્યાર્થિનીના પિતા નીતિન નરેન્દ્રકુમાર પુત્રીનું લિવિંગ સર્ટિફિકેટ (LC) લેવા માટે સ્કૂલે આવ્યા હતા. સ્કૂલના આચાર્ય સુધાકર પાંડા દ્વારા ડીંડોલી પોલીસ મથકમાં કરાયેલી અરજી મુજબ, વાલી નીતિન નરેન્દ્રકુમાર દ્વારા LCની માંગણી કરવામાં આવી હતી. નિયમ મુજબ, આચાર્યએ વાલીને LC ફોર્મ પર સહી કરવાનું કહેતાં તેમણે સ્પષ્ટપણે ના પાડી દીધી હતી અને આચાર્ય સાથે અભદ્ર ભાષામાં વાત કરી હતી.

કોમ્પ્યુટર ફેંકી દીધું અને આચાર્યને ધમકી આપી

ફરિયાદ મુજબ, આચાર્યની કેબિનમાંથી ગુસ્સામાં બહાર નીકળતી વખતે વાલી નીતિન નરેન્દ્રકુમારે આચાર્યને 'સ્કૂલની બહાર મળો, હું તમને જોઈ લઈશ' તેવી ધાક-ધમકી પણ આપી હતી. આ ધમકી બાદ વાલીએ પોતાનો ગુસ્સો શાંત પાડવાને બદલે વધુ હિંસક પગલું ભર્યું હતું. ધમકી આપ્યા પછી નીતિન નરેન્દ્રકુમાર સીધા રિસેપ્શન કાઉન્ટર પાસે ગયા અને ત્યાં રાખેલું કોમ્પ્યુટર ઉંચકીને જોરથી ફેંકી દીધું હતું. આ હરકતથી રિસેપ્શન કાઉન્ટર પર મોટું નુકસાન થયું હતું. સ્કૂલના આચાર્યના જણાવ્યા મુજબ, આ સંપૂર્ણ ઘટના સ્કૂલના CCTV કેમેરામાં સ્પષ્ટપણે રેકોર્ડ થઈ છે.